Dy institucione kyçe të Strukturës së Posaçme Anti-korrupsion, e konsideruara FBI shqiptare dhe Prokuroria e Posaçme, shpejt do të kenë 2 drejtuesë të rinj. Aida Hajnaj lirohet zyrtarisht nga detyra më 1 shtator, ndërsa pritet që me verifikimet e fundit, të zgjidhet pasuesi i saj mes 7 kandidatëve në garë. Altin Dumani po ashtu mbyll 3-vjeçarin e tij në krye të Prokurorisë së Posaçme më 31 dhjetor, e sipas ligjit, Këshilli i Lartë i Prokurorisë duhet të çelë garën nga mesi i këtij shtatori.
***
Aida Hajnajt, gruas së parë në krye të FBI-së shqiptare, sipas ligjit i mbaron mandati 5-vjeçar më 31 gusht. Këshilli i Lartë i Prokurorisë do ta lirojë nga detyra në një mbledhje në prani edhe të përfaqësuesve nga Prokurori i Përgjithshëm, Ministria e Drejtësisë, Eu4Justice dhe OPDAT. Deri në përzgjedhjen e emrit të ri, BKH do të udhëhiqet nga zëvendësdrejtori Joni Keta i cili është njëherësh kandidat për të marrë drejtimin.
Ky vendim i hap rrugë zgjedhjes së drejtuesit të ri të institucionit, procedura për të cilin ka nisur prej muajit qershor dhe aktualisht gjen nën ethet e garës 7 kandidatë Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta. Kjo shtatëshe kaloi fazat e komisionit përzgjedhës, përbërë nga 3 prokurorët e SPAK Altin Dumani, Arben Kraja dhe Behar Dibra, në një garë me 13 kandidatë. Ata iu nënshtruan testit për aftësitë fizike, esesë me shkrim dhe testit logjik, poligrafit dhe intervistës me gojë para komisionit.
Tashmë, i duhet të kalojnë në filtrin e një komisioni të dytë, atij për Verifikimit e Figurës dhe Pasurisë. Anëtarët e tij, gjyqtarja e posaçme Saida Dollani, 2 prokurorë të SPAK, Behar Dibra dhe Eneid Nakuçi, dhe dy hetues të BKH, u mblodhën këtë të premte, për të nisur kontrollin e kandidatëve. Rreth tyre mblidhet informacion nga shërbimi sekret dhe institucione për pastërtinë e figurës përfshirë dhe rrethin familjarë të tyre, si dhe analizohen pasuritë e tyre bazuar mbi deklaratat pranë Inspektoratit të Lartë i Deklarimit dhe Kontrollit të Pasurisë. 7 kandidatët do të shortohen për tu përcaktuar relatori nga anëtarët e Komisionit i cili do të merret me secilin prej kandidatëve.
Pas këtij procesi, është sërish Komisioni i Përzgjedhjes, i përbërë nga treshja e SPAK që përcakton kandidatin më të mirë, i cili më tej do t’i nënshtrohet një programi trajnimi dhe do t’i dërgohet për miratim Këshillit të Lartë të Prokurorisë. Me interes pritet nëse KLP do ta votojë në bllok të pëlqyerin e Prokurorisë së Posacme, apo do t’i ndajë votat. Gara drejt zgjedhjes së shefit të ri të BKH-së pati disa vonesa, që nisën me dilemat e Aida Hajnat në disa letërkëmbime me KLP për riemërimin e saj në një mandat të dytë pa iu nënshtruar garës, e që ekspozoi një krizë komunikimi brenda Strukturës së Posaçme. Gjithsesi, Hajnaj nuk u bë pjesë e garës, e cila u çel me vonesë, u shty edhe pas përfundimit të afatit të dorëzimit të dokumentacioneve të kandidatëve. Procesi është shoqëruar edhe me polemika sa i takon disa prej emrave të kandidatëve.
KLP-së i duhet të shpallë një tjetër datë të rëndësishme mbledhjeje në mes të shtatorit, për të çelur garën për drejtuesin e ri të SPAK. Altin Dumanit i përfundon mandati 3-vjeçar më 16 dhjetor. Nga fundviti ai kthehet në prokuror të thjeshtë në SPAK, deri në 2028-ën, kur mbyll 9-vjeçarin brenda Strukturës së Posaçme.
Komente
