Të gjithë shqiptarët me origjinë shqiptare Kosova, Maqedonia e Veriut, Presheva e vende të tjera do të mund ta përfitojnë shtetësinë shqiptare edhe pa mbushur 18 vjeç. Ndryshimet në ligjin e vitit 2020 për Shtetësinë u miratuan në seancën e djeshme plenare dhe risitë kanë të bëjnë me heqjen e kufirit të moshës. Një ndër propozuesit kryesor të ndryshimeve ligjore është Federata Shqiptare e Futbollit, me qëllim tërheqjen e talenteve të reja nga vendet fqinje. Në foltoren e Kuvendit, ministri i Brendshëm Taulant Balla, tha se do të propozojë që të hiqet edhe kriteri mbi njohuritë e gjuhës dhe historisë.
“Ne kërkojmë që qytetarët e Kosovës që kanë gjuhë zyrtare, e flasin gjuhën aq bukur sa ne dhe e njohin historinë tonë sa ne, nuk kanë pse t’i nënshtrohen një testi për gjuhën apo historinë. Në këtë këndvështrim do bëhet një përjashtim për shtetet ku gjuha shqipe është gjuhë zyrtare. Edhe në Maqedoninë e Veriut gjuha shqipe është gjuhë zyrtare, ndaj edhe gjithë vëllezërit dhe motrat që do kërkojnë shtetësinë shqiptare, kjo do mundësohet. Këtë vendimmarrje do e quaja historike, për të çuar përpara një përgjegjësi që ka vendi amë për ata që aplikojnë për pasaportat me natyralizim”, tha Balla.
Ndërkaq ministrja për Rininë Bora Muzhaqi përmendi lehtësitë për talentet e reja, duke sjellë raste suksesi të futbollistëve të kombëtares që luajnë në Kombëtare.
“Dua t’iu ftoj të përfytyroni historinë tjetër, atë ku Daku dhe Asani, apo Berat Gjimshiti, Nedim Bajrami, apo Ylber Ramadani të kishin pasur mundësinë të plotësonin ëndrrën e tyre e të luanin për fanellën kuqezi që në moshë të vogël, në të gjithë ekipet zinxhir të kombëtares tonë. Kushedi se sa ekipe të suksesshme dhe sa suksese sportive do t’i kishin dhuruar anembanë të gjithë shqiptarëve, qoftë pozitë apo opozitë”, tha ministrja Muzhaqi.
Në një reagim në rrjetet sociale, kryeministri Edi Rama shkruan se me ndryshimet e miratuara në ligjin “Për shtetësinë”, talenteve të sportit që kanë lindur nga jashtë Shqipërisë, u krijohet mundësia që të pajisen me pasaportën shqiptare edhe pa mbushur 18 vjeç.
