TIRANË- Propagandë, e quan Partia Demokratike, deklaratën e sotme të ministrisë së Shëndetësisë, e cila tha se shkak për numrin e lartë të rasteve të reja me COVID-19 janë grumbullimet e njerëzve.
Me anë të ish- deputetit Bardh Spahia, PD-ja akuzon qeverinë se e ka keqmenaxhuar situatën e COVID-19 në Shqipëri dhe tregues për këtë është QSUT-ja, e cila është vatra më e madhe e infeksionit.
"E turpshme propaganda se grumbullimet masive qenkan shkaku kryesor i rritjes së numrit të të infektuarve!!! E pështirë që kjo propagandë vihet në gojën e atyre që i thonë vetes profesionistë. Ajo që, për turpin e tyre, fshehin militantet peofesioniste të Edi Ramës është se rastet e të infektuarve të Tiranës, të publikuar sot, i takojnë kontakteve të prekur në QSUT dhe Senatorium.
QSUT është sot vatra më e madhe e infeksionit në vend, pavarësisht se Edi Rama dhe Ogerta Manastirliu vazhdojnë të heshtin për këtë dështim spektakolar. Rritja e numrit të të infektuarve, përfshi personelin shëndetësor, është treguesi më kokëfortë i keqmenaxhimit nga qeveria, e cila kujdeset vetëm për një fasadë të rreme.
Qytetarët nuk mund të mbahen në asnjë rast përgjegjës pse kanë ushtruar të drejtën kushtetuese për t’u mbledhur. Rritja e numrit të të infektuarve është dështimi direkt i kryeministrit të varfërimit të shqiptarëve. Ai që vjedh shqiptarët edhe tek maskat për mjekët dhe letrat higjenike për të sëmurët me COVID, nuk e ka problem të gënjejë edhe kur është direkt fajtor. Çdo ditë me Edi Ramën kryeministër është fatkeqësi për këtë vend", shkruan Spahia.
Komente
