Kombëtarja shqiptare e futbollit luan nesër (e martë) në 20:45 kundër Ishujve Faroe në transfertë. Dueli vlen për grupin E kualifikues të Euro 2024, me kuqezinjtë që mbërritën dje në Torshavn dhe zhvilluan stërvitjen e parë. Djemtë tanë do detyrohen të luajnë në jo më shumë se 10 gradë celsius, në një klimë të lagësht dhe me erë, kjo edhe për shkak të vendosjes së Ishujve Faroe.
Stadiumi "Tórsvøllur" ka kapacitet prej 6.500 vendesh dhe është me bar artificial. Në një pamje të parë, impianti duket si ai i Partizanit në periferi të Tiranës. Pas dy ndeshjeve në grupin E, Kombëtarja me tri pikë mban vendin e tretë, njëjtë sa Polonia e vendit të dytë. Me një ndeshje më shumë, Çekia kryeson me 7 pikë.
Stadiumi ku do luajë Kombëtarja të martë
"Tórsvøllur" është stadiumi i futbollit në zonën sportive të Gundadalur në Tórshavn, kryeqyteti i Ishujve Faroe. Stadiumi ka kapacitet prej 6,500 tifozësh dhe u ndërtua në vitin 1999 për t'u bërë stadiumi kombëtar i vendit, për të siguruar një sipërfaqe me bar artificial në të cilën mund të luheshin ndeshjet ndërkombëtare të futbollit. Më parë, kombëtarja e Ishujve Faroe i luante ndeshjet e saj në shtëpi në qytetin Toftir në stadiumin Svangaskarð. Në gusht 2011, u prezantuan prozhektorët dhe këto u përdorën zyrtarisht për herë të parë për ndeshjen e futbollit midis Ishujve Faroe dhe Italisë më 2 shtator 2011.
Disa informacione mbi Ishujt Faroe
Ishujt Faroe, janë një grup ishujsh në Atlantikun e Veriut dhe një territor autonom i Mbretërisë së Danimarkës . Ato ndodhen 320 kilometra në veri-veriperëndim të Mbretërisë së Bashkuar. Ishujt janë pjesë e Mbretërisë së Danimarkës, së bashku me Danimarkën kontinentale dhe Grenlandën. Ishujt kanë një sipërfaqe totale prej rreth 1,400 kilometra katrorë me një popullsi prej 54,000 që nga qershori 2022. Kryeqyteti dhe qyteti më i madh është Tórshavn.
Terreni është i thyer dhe klima oqeanike është me erë, e lagësht, me re dhe e freskët. Temperaturat për një klimë të tillë veriore janë të moderuara nga Rryma e Gjirit , mesatarisht mbi zero gradë celsius gjatë gjithë vitit dhe duke lëvizur rreth 12 °C në verë dhe 5 °C në dimër.
Komente
