Në kuadër të kontrolleve për sigurinë detare, Policia Kufitare ka bllokuar 44 mjete lundruese gjatë kësaj javë nga Ksamili në Koman. Mjetet e bllokuara janë 21 jet ski, 13 skafe, 6 gomone dhe 4 varka metalike .
25 mjete lundruese janë bllokuar nga Ksamili në Vlorë. 13 mjete lundruese janë bllokuar nga Durrësi në Shëngjin. 6 mjete lundruese janë bllokuar në Velipojë dhe Koman.
10 prej mjeteve lundruese të bllokuara janë konstatuar nga Policia Kufitare duke lundruar brenda perimetrit të sigurisë, shkelje e cila rrezikonte jetën e pushuesve. Drejtuesit e këtyre mjeteve janë ndëshkuar secili me masë administrative 100,000 deri në 120,000 lekë të rinj.
Drejtuesit e 34 mjeteve të tjera lundruese, krahas masës së bllokimit të mjeteve, u ndëshkuan secili me masë administrative 10,000 lekë për mungesë dokumentacioni.
Po gjatë kësaj jave, Njësia Policore Detare dhe Policia Kufitare iu kanë dhënë ndihmë turistëve dhe vizitorëve në 14 raste në hapësirën detare nga Ksamili në Koman, në shumicën e rasteve ju rrezikohej jeta për shkak të prishjes së mjeteve lundruese, apo duke mos u kthyer dot në breg për shkak të dallgëve.
