Flamuri turk është ngritur sot në ambasadën e Turqisë në Damask, kryeqyteti i Sirisë, pas një periudhe 12-vjeçare që kur aktivitetet diplomatike të Turqisë ishin pezulluar për shkak të luftës civile në Siri.
Ky hap vjen gati një javë pas rënies së regjimit të Bashar al-Assad. Ambasada turke njoftoi se ka rinisur operacionet e saj, duke emëruar Burhan Koroglu, ambasadorin turk në Mauritani, si të dërguar me punë në detyrë në Damask.
Ambasada turke ndodhet në sheshin qendror Rawda, ku janë të vendosura misionet diplomatike të shumë shteteve të tjera. Aktivitetet diplomatike të Turqisë ishin pezulluar më 26 mars 2012, kur stafi dhe familjarët e tyre u kthyen në Turqi për shkak të pasigurisë që krijoi konflikti i armatosur në Siri.
Zv. presidenti turk, Cevdet Yilmaz, shprehu gëzimin për rinisjen e operacioneve dhe ngritjen e flamurit turk në ambasadë, duke theksuar se ky hap tregon përkushtimin e Turqisë për stabilitetin dhe paqen në rajon.
Pas një periudhe të gjatë të udhëheqjes, Bashar al-Assad është larguar drejt Rusisë, duke lënë pas një periudhë të pasigurtë pa mbështetje të fortë nga rebelët dhe forcat ndërkombëtare.
Komente
