PRISHTINË - Kosova dhe Spanja përballet këtë të martë në 'Fadil Vokrri' duke nisur nga ora 19:00 me ekipet U-21 në futboll. Sfida që vlen për kualifikueset e Euro 2027 për këto mosha dhe që finalet do zhvillohen në Shqipëri dhe Serbi ka krijuar një skandal të vërtetë.
Në njoftimet në kanalet e komunikimit për sfidën, Federata Spanjolle e Futbollit (RFEF) e ka quajtur Kosovën si 'territori i Kosovës'. Spanja nuk e njeh Kosovën si shtet dhe kjo nuk është e para herë që diçka e tillë ndodh në eventet e organizuara nga UEFA.
Për këtë skandal, kreu i Federatës së Futbollit të Kosovës, Agim Ademi i ka dërguar një letër ankesë për reagim kreut të UEFA-s, Aleksandër Ceferin dhe presidentit të RFEF-së, Rafael Louzan. Komentet shqip nuk kanë munguar në faqet e Federatës Spanjolle.
Reagimi i plotë:
Federata e Futbollit e Kosovës përmes një shkrese nga presidenti Agim Ademi drejtuar presidentit të UEFA-s, Aleksandër Çeferin dhe presidentit të RFEF-së, Rafael Louzan ka paraqitur notë proteste ndaj veprimit të papranueshëm të Federatës Spanjolle të Futbollit, e cila në komunikimet e saj zyrtare në prag të ndeshjes kualifikuese për Evropianin 2027, Kosovë-Spanjë, iu referua Kosovës si “territori i Kosovës”.
I nderuar President Çeferin,
Shpresoj që kjo letër t’ju gjejë me shëndet të mirë.
Në këtë periudhë të ngarkuar, do të preferoja të adresoja çështje më konstruktive dhe më vizionare që lidhen me të ardhmen e futbollit evropian. Mirëpo, fatkeqësisht, sërish jam i detyruar të ngre një problem që vazhdon të dëmtojë përfaqësimin tonë në garat evropiane, e që lidhet me mënyrën se si disa federata anëtare trajtojnë ekipet tona kombëtare.
Rasti i fundit ka të bëjë me Federatën e Futbollit të Spanjës (RFEF), e cila në kanalet e saj zyrtare në rrjetet sociale i është referuar Kosovës si “Territori i Kosovës”. Një qasje e tillë e mohon sovranitetin e Kosovës, e cila është shtet i pavarur dhe i përfaqësuar nga Federata e Futbollit të Kosovës, anëtare e barabartë dhe e plotë e UEFA-s, ashtu siç është edhe vetë RFEF.
Për fat të keq, nuk është hera e parë që përballemi me një sjellje të tillë nga Federata e Futbollit të Spanjës dhe ne e konsiderojmë këtë plotësisht të papranueshme. UEFA qëndron mbi vlera si uniteti, respekti dhe barazia ndërmjet të gjithë anëtarëve të saj, prandaj këto parime duhet të respektohen jo vetëm në veprime, por edhe në fjalë, nga çdo federatë anëtare.
Prandaj, kërkojmë nga UEFA një reagim të qartë dhe të menjëhershëm për këtë çështje, si dhe një korrigjim publik dhe pranim zyrtar nga Federata e Futbollit të Spanjës, duke e pranuar se veprimet e tyre ishin të papërshtatshme dhe në kundërshtim me parimet themelore të UEFA-s.
Ne shpresojmë dhe besojmë se Federata e Futbollit e Kosovës do të vazhdojë të trajtohet si një anëtare e barabartë e UEFA-s, jo vetëm nga vetë UEFA, por edhe nga të gjitha federatat tjera kombëtare.
Ju falënderoj sinqerisht për vëmendjen ndaj këtij problemi serioz dhe presim veprime të shpejta në mbështetje të kësaj çështjeje.
Me respekt,
Agim Ademi
President
Kosovë - Spanjë, posteri ofendues i Federatës Spanjolle
Komente
