Financieri i Partisë Demokratike, Ilir Dervishi, mohon para Prokurorisë njohjen me kompanitë lobuese ‘Biniatta Trade’. Burime nga akuza sqaruan për Report Tv se Dervishi është thirrur në vazhdën e personave që kanë dijeni për rrethanat e hetimit që ka nisur Prokuroria lidhur me skandalin e lobimit rus për PD.
Dervishi ka qëndruar për rreth 30 minuta në zyrën e prokurorit Gjergji Tako, e sipas deklarimeve ai ka pranuar se ka firmosur lëvrimin e 125 mijë dollarëve për lobin, para të cilat janë deklaruar dhe në pasqyrat e depozituara në Komisionin Qendror të Zgjedhjeve.
Më parë, për këtë hetim ka dëshmuar dhe sekretari i PD-s, Arben Ristani, i cili po ashtu ka mohuar të ketë dijeni për pagesën prej 625 mijë dollarë e sipas tij partia opozitare s’kishte shkelur asnjë ligj, pasi çdo shpenzim gjatë fushatës e kishte deklaruar në KQZ.