Prokuroria e Maqedonisë së Veriut ka nisur hetimet për incidentin e rëndë që ndodhi në qytetin e Kumanovës ku polici hoqi dhe hodhi në tokë flamujt shqiptarë që ishin vendosur për festat e nëntorit.
“Është njoftuar prokurori publik, po ndërmerren veprime për zbardhjen e ngjarjes” njoftoi Prokuroria Publike e Maqedonisë së Veriut.
Pas këtij akti skandaloz Zv.ministri i Punëve të Brendshme Astrit Iseni njoftoi se do të nisë një procedurë disiplinore ndaj policit.
Duke thënë se çdo punonjës i Ministrisë së Punëve të Brendshme ka detyrim të respektojë ligjet dhe simbolet e të gjitha bashkësive etnike në Republikën e Maqedonisë së Veriut, Iseni u shpreh se ligjet do të zbatohen nga të gjithë dhe mosrespektimi i tyre do të sanksionohet pa përjashtim.
Për skandalin me flamurin shqiptar reaguan edhe partitë politike opozitare duke kërkuar dorëheqjen e ministrit të Brendshëm dhe dënimin e policit maqedonas.
Komente
