Bosilegrad, Serbi - Një skandal i vërtetë ka ndodhur në qytetin e Bosilegradit në Serbi, pasi ka përfunduar ndeshja e futbollit midis vendasve të KF Mlladost dhe klubit shqiptar nga Lugina e Preshevës, KF Tërnoci.
KF Tërnoci në një komunikatë tregon se me të përfunduar ndeshja, policia serbe ka hyrë në fushën e lojës dhe ka goditur një futbollist të ekipit të tyre e më pas është futur edhe në dhomat e zhveshjes.
Sipas FOLonline, mësohet se policët kanë kontrolluar çantat dhe sendet personale të futbollistëve shqiptarë. Ky është një rast i rrallë në futboll ku policia futet në dhomat e zhveshjes, duke të kujtuar skandalin e 14 tetorit 2014 në Beograd, në sfidën Serbi - Shqipëri.
KF Tërnoci bën me dije se ndaj futbollistit Veton Zeqiri është ushtruar dhunë, ndërsa ka pasur presion dhe ofendime ndaj lojtarëve të tjerë dhe stafit. Pas kësaj, policia pas fushës është futur në dhomat e zhveshjes duke kontrolluar në çantat e futbollistëve, e më pas ka shoqëruar ekipin në rajonin e policisë.
Kapiteni i ekipit dhe lojtari i dhunuar kanë kërkuar që të japin një deklaratë, gjë e cila nuk është pranuar nga policia serbe. Klubi i KF Tërnocit bën me dije se pas pyetjeve në polici ata janë lënë të lirë. Ata shtojnë se kryesia e klubit po mendon tërheqjen nga pjesa e mbetur e sezonit, pasi shëndeti i lojtarëve është prioritet.
Reagimi i plotë i KF TËRNOCIT (pa ndërhyrje):
Turpi dhe skenari i keq i Bosilegradit. Ja çka na ndodhi
Sot, ekipi ynë në frymën e sportit dhe Fer Plejit është paraqitur në stadiumin e Bosilegradit për të zhvilluar ndeshjen kampionale në kuadër të Ligës Rajonale të Rrethit të Pçinjës me skuadrën vendëse, Mlladost.
Gjatë tërë ndeshjes, u pa tendenca e nikoqirëve, në bashkëpunim me arbitrat, për të na dëmtuar në rezultat. Ashtu edhe ndodhi. Pasi na ndëshkuan padrejtësisht me dy kartona të kuq, ndeshja shkoi në 2: 1 në favor të vendësve.
Duke u pajtuar me fatin e ndeshjes, asnjëherë s’e kishim menduar se ky ishte fillimi i një drame për ekspeditën e klubit tonë.
Një pjesëtar i sigurimit në stadium, për arsye të panjohura, fton të futet policia në fushë, e cila pa lejen e delegatit nuk guxon ta shkel terrenin.
Me plot egërsirë dhe mllef, njëri nga policët godet futbollistin tonë, Veton Zeqiri, ndërsa ndaj të tjerëve pasojnë fyerjet e ndryshme.
Edhe këtu nuk ishte fundi.
Policia futet si në filma në zhveshtoren tonë duke kryer një bastisje tek gjërat personale të futbollistëve.
Në mënyrë të egër policët bastisin gjithçka nën pretekstin e kërmikimit të armëve të ftofta e çka jo tjetër.
Pasi nuk gjindet asgjë, skenari i dramës policore vazhdon me dërgimin e ekipit tonë në stacionin policor të këtij qyteti.
Këtu kërkohet nga kapiteni ynë të jepet deklaratë ndërsa nuk pranohet deklaratë të japë edhe futbollisti ynë i rrahur.
Krejt në fund, lihemi të lirë ndërsa deklaratën për dhunën policore do ta japim në stacionin e Bujanocit.
Në fund, konstatojmë se maltretini dhe dhuna e sotme në Bosilegrad ishte një skenar i përgatitur nga qarqe jashta futbollit dhe për nevoja krejtësisht tjera.
Shtrohet pyetja, nëse vërtetë policia ka pranuar informacione se ekipi ynë ka shkuar në Bosilegrad për incidente, pse ka lejuar të fillojë ndeshja? Pse ka lejuar ekspeditën e KF Tërnoci të futet në qytet,etj?
Po ndaj kujt patëm ne të shkaktojmë dhunë?
Ne jemi vetëm për futboll dhe sport si urë lidhëse mes popujve.
Por, siç po shihet kundër sportit e kundër një etnie të tërë janë të tjerët. Janë ata që thurrin skenare që u dalin aq qesharake.
Ditëve në vijim, do të shyrtojmë prezencën tonë në garat e mëtejme duke pasur parasysh në radhë të parë sigurinë dhe shëndetin e djelmoshve tanë si dhe duke mos rënë në grackë të atyre që përmes nesh dëshirojnë realizimin e qëllimeve të tyre politike apo etnike.
Në vazhdim ju sjellim pamje të ndodhive të sotme në Bosilegrad.
Nga kryesia e KF Tërnoci
Komente
