Mbrojtësi i Liverpool, Giovanni Leoni këputi ligamentin kryqëzor anterior në gjurin e majtë të martën në debutimin e tij me Liverpoolin, pas 79 minutash në Kupën Carabao kundër Southampton.
"Ai ndihet keq sepse këputi ligamentin, që do të thotë se do të jetë jashtë për rreth një vit", tha trajneri Arne Slot për 18-vjeçarin italian, duke konfirmuar diagnozën, e cila ishte publikuar të mërkurën, në një konferencë për shtyp.
"Është shumë e vështirë të gjesh diçka pozitive në lidhje me atë që i ndodhi. Ai është kaq i ri, erdhi në një vend të ri dhe po luante kaq mirë në ndeshjen e tij të parë. Është e vështirë të gjesh diçka pozitive në këtë situatë, megjithëse duhet të përpiqemi. Mendoj se arsyeja është se ai është kaq i ri dhe se ka ende shumë vite karrierë përpara pasi të rikuperohet nga ky dëmtim i tmerrshëm", tha trajneri i Liverpool.
Liverpool investoi 30 milionë euro në verë për të bindur Parmën të shiste Leonin, duke e marrë në Premier League me idenë e zhvillimit të tij për t'u bërë Van Dijk i ri.
Dëmtimi i tij e lë Slot me vetëm tre mbrojtës qendre, titullarët Van Dijk dhe Konate dhe Joe Gomez, i cili ndiqej prej kohësh nga Milani në fazat e fundit të afatit kalimtar dhe i cili ishte partner i Leonit kundër Southampton.
Dëmtimi i Leonit është shndërruar në një mundësi për Federico Chiesan. Ish-sulmuesi i Juventusit kishte mbetur jashtë nga skuadra e Ligës së Kampionëve te Liverpoolit, por sipas një rregulli të futur këtë vit, ai tani mund të përfshihet, duke zëvendësuar shokun e tij të ekipit të dëmtuar rëndë. Slot konfirmoi ndryshimin.
Komente
