Nga Mark Savage, BBC
Eurovision arrin finalen e tij të madhe të shtunën mbrëma në Torino, me Ukrainën, Italinë dhe Britaninë e Madhe ndër më të preferuarat për të fituar. Sam Ryder i Britanisë së Madhe, një punëtor ndërtimi i shndërruar në yll të TikTok, i mahniti njerëzit aq shumë gjatë provave saqë edhe parashikuesit më jo-optimistë i kanë rritur shanset e tij për të fituar gjatë gjithë javës.
Tani, e di se çfarë do të thoni: "Po, me siguri Eurovizioni ka të bëjë me politikën". Dhe deri diku keni të drejtë. Vendet shpesh shkëmbejnë vota me fqinjët e tyre. Nëse Greqia dhe Qiproja nuk i japin njëra-tjetrës pikët maksimale, ndoshta kjo do të provokonte një “incident diplomatik”.
Por disa studime - këtu është më i fundit - tregojnë se votimi politik rrallë ndikon fituesin e përgjithshëm. Për të marrë pikë të mjaftueshme, nevojitet një gamë e gjerë mbështetjeje që është e pamundur të arrihet vetëm përmes favorizimit. Megjithatë, votat politike ndikojnë padyshim në rezultatet e mesit të tabelës, ndërkohë që pozicionet e fundit janë të rezervuara për këngët më të këqija. Këtë vit sigurisht që politika pritet të ndikojë rezultatin. Ukraina është kandidatja e supozuar, pasi simpatia e publikut është rritur ndjeshëm pas pushtimit të Rusisë.
Por disa vëzhgues janë të kujdesshëm edhe ndaj këtij sugjerimi. A po mendon vërtet një 17-vjeçare në Talin ambiciet gjeopolitike të Vladimir Putinit kur merr telefonin për të votuar në një konkurs kënge, apo po mendojnë: "Ai djali nga Belgjika duket shumë ‘hot’"?
Gjithsesi, gëzimi i Eurovizionit nuk ka të bëjë me analizimin e vështirësive të sistemit të votimit. Ka të bëjë me argëtimin në shfaqjet e çuditshme, të bukura, pasionante që kontinenti (dhe Australia) parashtron. Por më poshtë gjeni një përshkrim të thjeshtë dhe të shpejtë të momenteve më interesante që duhet të keni kujdes kur Finalja e Madhe të hapë siparin mbrëmjen e sotme.
1-Ky ujk është banane (B-A-N-A-N-A-S)
‘Subëoolfer’ i Norvegjisë është akti më i vjetër që ka dalë ndonjëherë në skenën e Eurovizionit, pasi u formua 4.5 miliardë vjet më parë në Hënë përpara se të vinte në Tokë për të dominuar muzikën pop. Kjo është ajo që të paktën kënga synon të na tregojë.
Të njohur si Keith dhe Jim, ata fshehin identitetin e tyre pas maskave të verdha me krem dhe vendosin një vështrim modern në historinë e Kësulëkuqes mbi një ritëm të madh shtëpiak. “Para se ai ujku të hajë gjyshen, jepini atij ujkut një banane”, këshillojnë ata.
Një nga ujqërit përflitet se është Ben Adams nga A1 i viteve '90... dhe ne pamë gruan e tij jashtë hotelit të delegacionit norvegjez të enjten. Kështu që ‘thashethemi’ duhet të jetë i vërtetë.
2) Kënga për flokët e Meghan Markle
‘In Corpore Sano’ i Serbisë padyshim që është një këngë që është shkruar gjatë pandemisë nga dikush që po kalonte në një krizë nervore. Një ‘odë’ për higjienën personale, lënga shtron pyetjen ‘e përjetshme’: "Cili është sekreti pas flokëve të shëndetshëm të Meghan Markle? Unë mendoj se hidratimi i thellë është arsyeja ", përpara se të kalojë në një ekzaminim të ethshëm të higjienës personale dhe nëse "rrathët e errët rreth syve tregojnë probleme me mëlçinë”.
Ju imagjinoni këngëtaren Konstrakta (e njohur si Ana Duriç) duke i shkarravitur këto tekste me obsesion në murin e saj gjatë një nate veçanërisht të errët shpirtërore - një imazh që përforcohet vetëm kur ajo bashkohet në skenë nga një kor që intonon latinisht.
Sikur të mos ishte mjaftueshëm e çuditshme, ajo e kalon të gjithë performancën e saj duke larë duart në një legen të vogël, detaj që është jo pak i preferuar nga të gjithë ata fansa që ndjekin me tifozllëk në arenë.
3) Xhiroja e fitores së Maneskin
Grupi italian i rokut Måneskin zuri vendin e parë në Eurovizionin e vitit të kaluar me këngën e tyre ‘Zitti E Buoni’ dhe vazhdoi të bëhej një fenomen i vërtetë global, duke bërë turne me Rolling Stones, duke fituar një çmim MTV dhe duke shënuar një miliardë transmetime të hitit të tyre ‘Përgjërohem'.
Katërshja do të kthehet në skenën e Eurovizionit sonte për të luajtur këngën e tyre të re, ‘Supermodel’, e cila u frymëzua nga "njerëzit e rremë" që ata takuan në Los Anxhelos vitin e kaluar.
“E di që nuk është kënga jonë më e thellë, por është e mirë”, thotë drejtuesi grupit. Damiano David.
Fansat do të vënë re se ai është pak më pak i lëvizshëm se normalisht, pasi ndrydhi kyçin e këmbës duke xhiruar një video muzikore. Por grupi është gati të rifitojë skenën që i solli ata në një audiencë ndërkombëtare.
“Nuk e di nëse do të jem në gjendje të vrapoj, por thjesht do të kënaqem duke mos qenë në garë”, thotë David.
4) Garuesja ‘pa frymë’ e Spanjës
Në rrethana të ndryshme, këngëtarja kubano-spanjolle Chanel nuk do të ishte pjesë e konkursit. Por dy vjet më parë, ajo ishte një nga pesë aktoret kandidate në listën e ngushtë për të luajtur Anita në risjelljen në skenë të ‘Ëest Side Story’ të Steven Spielberg. Roli përfundimisht i shkoi Ariana deBose, por humbja e kinemasë ishte fitimi i Eurovizionit.
Kënga e lezetshme pop e Chanel, SloMo, u shkrua fillimisht për Jennifer Lopez dhe ka një rutinë kërcimi të denjë për vetë Lopez.
Për t'u siguruar që ajo mund të realizonte koreografinë pa humbur frymën, Chanel u stërvit për Eurovision duke kënduar ndërsa vraponte në një pistë elektronike.
Pas tre ditësh, ajo vendosi se sfida nuk ishte e mjaftueshme dhe filloi të vraponte me taka. Tani ky është përkushtim.
5) A mund ta bëjë Italia 2 fitore të njëpasnjëshme?
Konkursi i këtij viti ka sjellë shumë kopjues Maneskins - shumica e të cilëve u hodhën jashtë në gjysmëfinale - por Italia ka shkuar në drejtim të kundërt. Hyrja e tyre vjen nga Mahmood, një nënkampion në 2019, i cili është bashkuar me yllin e tij të popit italian Blanco për një baladë të vjetër dhe, më lejoni t'ju them, është një ‘mashtrim’ drithërues.
Brividi (përkthyer si "të dridhura") është një këngë që tregon se si, në dashuri, frika nga të qenit i papërshtatshëm është një përvojë universale - pavarësisht gjinisë, identitetit apo seksualitetit.
“Do të doja të të dua, por gaboj gjithmonë”, këndojnë dyshja, me përzierjen e duhur të patosit dhe vulnerabilitetit, “dhe kam të dridhura, të dridhura, të dridhura”.
Në Spotify, aktualisht është kënga më e klikuar nga konkursi i këtij viti.
Kjo nuk është një garanci për votat e së shtunës mbrëma (po sikur të gjitha ato klikime të vijnë nga italianët, të cilët nuk mund të votojnë për përfaqësuesin e tyre?), por është një shenjë se Ukraina mund të mos ketë konkurrencë.
Nëse Italia fiton, ajo do të jetë vendi i parë që do të ketë fitore të njëpasnjëshme që nga hiti i jashtëzakonshëm i Irlandës në fillim të viteve 1990.
6) Kostumi i gjymtuar i Australisë
Sheldon Riley i Australisë shkroi këngën e tij, ‘Not The Same’, vite më parë si një mesazh për veten e tij më të re, për vështirësitë e përballjes me ‘Sindromën Asperger’ dhe për t'u pajtuar me seksualitetin e tij në një familje thellësisht fetare.
Ai thotë se e ka kënduar që në moshën 15-vjeçare - por mesazhi ka ndryshuar nga dëshpërimi në shpresë, pasi mësoi të jetë krenar për dallimet e tij.
Transformimi i këngës është i dukshëm edhe në skenë. Kur fitoi në Australi të drejtën për të marrë pjesë në Eurovision në fillim të këtij viti, ai ishte i veshur me të zeza, i rrethuar nga grupe të zymta dhe industriale. Tani, ai është i gjithi në të bardhë dhe i larë në dritë.
Dhe ai mezi lëviz. Kostumi i Sheldon peshon 40 kg - falë 200,000 kristaleve Sëarovski dhe 90,000 perlave Sëarovski të qepura në pëlhurë. Së bashku me maskën e tij dhe aksesorët e tjerë, pesha totale është 51 kg. Imagjinoni tarifat e tij të tepërta të bagazheve.
7) Këngëtari i përgjumur
Besoni apo jo, kur Stefan i Estonisë të performojë të shtunën mbrëma, ai sapo do të jetë zgjuar.
"Zakonisht, unë shkoj të fle para se të dal në skenë," i tha ai Steve Holden në podkastin zyrtar të Eurovison.
"Nuk e di pse, por trupi im më thotë, 'duhet të pushosh' dhe unë shkoj diku të qetë dhe bëj një sy gjumë për 15 minuta, dhe më pas zgjohem si një person i ri".
Megjithatë, nuk ka asgjë të përgjumur në performancën e tij, pasi Stefani rrotullohet rreth arenës si një qenush i vogël, madje duke bërë një kërcim të guximshëm mbi ujëvarën e ndërtuar në skenë. Le të shpresojmë që ai të kujtohet të vendosë alarmin e tij./ Përktheu nga BBC Shqiptarja.com
