Maturantët fitues në universitetet publike dhe private, nga sot 29 gusht deri më 11 Shtator, nëpërmjet 7 fazave 48-orëshe, do të mund të regjistrohen në fakultetet përkatëse.
Ministrja e Arsimit Ogerta Manastirliu përmes një postimi në rrjetet sociale u ka uruar suksese të gjithë maturantëve që do të ulen për herë të parë në bankat e Universitetit, teksa ka rikujtuar edhe hapat që të rinjtë duhet të ndjekin për t’u regjistruar në degën që ata dëshirojnë.
Çdo maturant i shpallur fitues ka dy ditë kohë për t’u regjistruar, përndryshe vendi i tij i kalon automatikisht një kandidati në pritje.
Pas përfundimit të fazave, do të ketë edhe një periudhë çregjistrimi për ata që dëshirojnë të ndryshojnë degën dhe të rikthehen në garë për raundin e dytë.
Sipas Rrjetit Akademik Shqiptar degët e preferuara për këtë vit janë Teknologjia dhe Inxhineria, ndjekur më pas nga mjekësia.
Ndërkohë, programet e mësuesisë vijojnë të mbeten më pak të preferuarat, me një përqindje që nuk kalon 7.5, duke ruajtur të njëjtat ritme si vitet e mëparshme. Degët profesionale, po ashtu kanë shënuar rritje.
Mbi 20.000 maturantë aplikuan për studime në universitetet publike dhe private, një shifër që nuk ishte arritur më parë.
Konkretisht 500 maturantë më shumë kanë aplikuar për arsimin e lartë krahasuar me një vit më parë.
Komente
