Do pushtohet apo jo Rripi i Gazës nga Izraeli? Kjo pritet të vendoset mbrëmjen e sotme (7 gusht), teksa ka nisur edhe mbledhja e Kabinetit të Sigurisë.
Kryeministri i Izraelit, Benjamin Netanyahu, ka thirrur një grup të vogël ministrash të lartë për t’i shqyrtuar planet që ushtria izraelite t’i marrë nën kontroll më shumë territore në Rripin e Gazës, me gjithë kundërshtimet në rritje brenda dhe jashtë vendit për luftën që ka zgjatur pothuajse dy vjet.
Nëse kjo do të ndodhë, plani i pushtimit pritet të zgjasë 4-5 muaj, informon media.
Izraeli "nuk do ta aneksojë Gazën" dhe do t'ia transferojë administratën e tij të përkohshme një pale të tretë nëse Hamasi dorëzon armët dhe kthen pengjet. Kryeministri izraelit Benjamin Netanyahu e bëri këtë deklaratë për transmetuesin indian CNN18 , raporton Ynet , pas një takimi me ambasadorin e Nju Delhit, JP Singh.
Sipas tij, "plani është që Rripi t'ia transferohet një organi që do të ushtrojë kontroll të përkohshëm mbi të, pra forcave arabe". Dhe nëse Hamasi dorëzon armët, lufta mbaron shpejt. Nga ana tjetër, mediat raportojnë se SHBA-të dhe Trump janë kundër aneksimit të Gazës nga Izraeli.
Netanyahu mblodhi kabinetin e sigurisë pas një takimi triorësh këtë javë me shefin e ushtrisë, të cilin zyrtarët izraelitë e përshkruan si të tensionuar, duke thënë se kreu i ushtrisë kishte kundërshtuar zgjerimin e fushatës ushtarake.
Hamasi bëri një reagim të mëvonshëm, duke deklaruar se:
"Netanyahu po sakrifikon pengjet për interesat e tij personale!"
Sondazhet tregojnë se shumica e izraelitëve duan që lufta të përfundojë me një marrëveshje që do të çonte në lirimin e pengjeve të mbetura në Gazë.
Qeveria e Netanyahut ngul këmbë në fitore të plotë kundër Hamasit - grupit militant palestinez të shpallur organizatë terroriste nga Shtetet e Bashkuara dhe Bashkimi Evropian.
Forumi i Familjeve të Pengjeve, që përfaqëson të afërmit e të rrëmbyerve që mbahen në Gazë, i kërkoi shefit të shtabit të ushtrisë, Eyal Zamir, ta kundërshtojë zgjerimin e luftës. IDF ëhstë kundër planit të pushtimit, por Netanyahu i ka kërcënuar drejtuesit me dorëheqje.
Ministri i Mbrojtjes i Izraelit, Israel Katz, theksoi të mërkurën se ushtria do t’i zbatojë vendimet e Qeverisë deri në arritjen e të gjitha synimeve të luftës.
OKB-ja i ka quajtur raportimet për një zgjerim të mundshëm të operacioneve ushtarake të Izraelit në Gazë si “thellësisht shqetësuese”.
Ushtria izraelite thotë se kontrollon rreth 75 për qind të Gazës. Shumica e popullsisë prej rreth 2 milionë banorësh është zhvendosur disa herë gjatë 22 muajve të fundit dhe organizatat humanitare paralajmërojnë se banorët janë në prag të urisë ekstreme.
Rreth 200 palestinezë kanë vdekur nga uria që nga fillimi i luftës, gati gjysma prej tyre fëmijë, sipas Ministrisë së Shëndetësisë në Gazë.
Lufta nisi kur militantët e udhëhequr nga Hamasi vranë rreth 1.200 njerëz, shumica civilë, në sulmin e 7 tetorit 2023 dhe morën peng 251 të tjerë.
Shumica e pengjeve janë liruar përmes armëpushimeve ose marrëveshjeve të tjera. Nga rreth 50 që mbeten ende në Gazë, besohet se rreth 20 janë ende gjallë. Lufta hakmarrëse e Izraelit ka vrarë mbi 61.000 palestinezë.
Pas deklaratave të Benjamin Netanyahut për të pushtuar me çdo kusht Gazën, vjen edhe reagimi i parë nga Hamasi.
"Planet e Netanyahut për të zgjeruar agresionin tregojnë pa asnjë dyshim se ai synon të lirojë pengjet dhe t'i sakrifikojë ata për interesat e tij personale", tha Hamasi në përgjigje të deklaratave të Kryeministrit izraelit, në lidhje me qëllimin e Izraelit për të marrë kontrollin e të gjithë Rripit të Gazës.
Sipas organizatës palestineze, "fjalët e Netanyahut zbulojnë qartë motivet e vërteta për tërheqjen e tij nga raundi i fundit i negociatave, pavarësisht faktit se një marrëveshje përfundimtare ishte afër".
Hamasi më pas lëshoi një paralajmërim, duke theksuar se "zgjerimi i agresionit kundër popullit tonë nuk do të jetë një shëtitje në park; çmimi i tij do të jetë i lartë".
Mediat raportojnë se Shtetet e bashkuara të Amerikës nuk e mbështesin një aneksim të Gazës nga izraeli.
Siç raporton së fundmi ‘Axios’, plani eksprem ushtarak nuk është i mirëpritur:
“Administrata Trump nuk e mbështet aneksimin e pjesëve të Gazës nga Izraeli”, shkroi gazetari i Axios, Barak Ravid, në X, duke cituar një zyrtar amerikan.
Teksa mbledhja e Kabinetit të Sigurisë ka filluar punimet nën drejtimin e kryeministrit Benjamin Netanyahu për të marrë një vendim mbi pushtimin e Gazës, veteranët e luftës, të cilët vuajnë nga çrregullimi i stresit post-traumatik (PTSD) pas luftimeve në Gaza, po bllokojnë trafikun në autostradën jugore Ayalon në shenjë proteste kundër mungesës së mbështetjes nga autoritetet izraelite dhe braktisjes së ushtarëve, disa prej të cilëve kanë kryer vetëvrasje.
Shtatëmbëdhjetë persona kanë kryer vetëvrasje që nga viti 2025.
Mbledhja e Kabinetit Politik dhe të Sigurisë ka filluar në zyrën e Kryeministrit Benjamin Netanyahu në Jerusalem, duke u përqendruar në zhvillimet në konfliktin në Rripin e Gazës, raporton Ynet.
Netanyahu pritet të kërkojë miratim për të urdhëruar IDF-në të pushtojë plotësisht Rripin, dhe ai dhe Ministri i Mbrojtjes Israel Katz do të autorizohen të marrin vendime në lidhje me procesin e pushtimit.
Ushtria është shprehur kundër pushtimit, por kryeministri izraelit insiston. Izraeli dëshiron ta çlirojë Gazën nga Hamasi, jo ta qeverisë atë ka deklaruar ai mes të tjerash.
"Ne duam të krijojmë një perimetër sigurie dhe t'ia dorëzojmë Gazën forcave arabe të cilat do ta qeverisin atë siç duhet", tha kryeministri izraelit Benjamin Netanyahu në një intervistë me Fox .
Kryeministri izraelit Benjamin Netanyahu konfirmon qëllimin e tij për të pushtuar të gjithë Rripin e Gazës, pavarësisht kundërshtisë së ushtrisë.
Edhe gjatë ditës së sotme ai këmbënguli në pushtim, por jo aneksim të Gazës, informon media.
Izraeli "nuk do ta aneksojë Gazën" dhe do t'ia transferojë administratën e tij të përkohshme një pale të tretë nëse Hamasi dorëzon armët dhe kthen pengjet".
Kryeministri izraelit Benjamin Netanyahu e bëri këtë deklaratë për transmetuesin indian CNN18 , raporton Ynet , pas një takimi me ambasadorin e Nju Delhit, JP Singh. Netanyahu gjithashtu theksoi nevojën për të bërë dallimin midis "civilëve të pafajshëm dhe Hamasit". Kryeministri izraelit dhe ambasadori indian, sipas një deklarate, diskutuan "zgjerimin e bashkëpunimit midis dy vendeve, veçanërisht në çështjet e sigurisë dhe ekonomike".
Sipas tij "plani është që Rripi t'ia transferohet një organi që do të ushtrojë kontroll të përkohshëm mbi të".
Kryeministri foli në një konferencë për shtyp me gazetarët indianë pas një takimi me ambasadorin indian në Izrael, JP Singh. Objektivat kryesore të luftës mbeten "shkatërrimi i plotë i Hamasit dhe kthimi i të gjithë pengjeve izraelite". Lufta, tha ai gjithashtu, sipas Haaretz, mund të përfundojë shpejt, madje edhe nesër, nëse Hamasi i dorëzon armët dhe i liron pengjet pa kushte.
Familjet e pengjeve kanë nisur një apel duke bërë thirrje për ndalimin e asaj që ata e quajnë "vendim katastrofik" për të pushtuar Rripin e Gazës dhe për një marrëveshje gjithëpërfshirëse për kthimin e të dashurve të tyre dhe një përfundim të menjëhershëm të luftës.
"Ata që i duam janë në rrezik të menjëhershëm: disa rrezikojnë jetën e tyre, të tjerë zhduken përgjithmonë në tokën e Gazës. Shteti i Izraelit është gjithashtu në rrezik: ne rrezikojmë të humbasim vlerat tona morale dhe përgjegjësinë tonë ndaj njëri-tjetrit. Bashkohuni me ne para se të jetë tepër vonë", deklaruan ata.
Komente
