Juristi Kreshnik Spahiu mendon se dita kur estabilishmentit politik aktual dhe lidershipit të partive me lider të pandryshueshëm do të vijë kur edhe femrat të dalin përballë tyre dhe të shpallin kandidaturat për kryeministre, duke ndjekur edhe si frymëzim emra të politikës botërore si Meloni, Merkel apo Thaçer, që bënë histori.
I ftuar në emisionin ‘Frontline’ të Report Tv, ai analizoi situatën politike me kuotat gjinore në Parlament. Pyetjes së moderatores Marsela Karapanço për liderët femra në politikë, ai iu përgjigj:
“Nëse ka energji pozitive dhe pjesa më e bukur që i ka mbetur Parlamentit aktual dhe që shpresohet edhe pas 11 Majit, është përfaqësimi i tij nga gratë. Pjesa më pozitive, me karakter është pjesa e grave në Kuvend. Qoftë përsa i përket mazhorancës dhe ashtu opozitës. Historia ka treguar se ata që e kanë mbajtur veten për lidera, drejtues, kanë përfunduar në dyert e gjykatës apo SPAK-ut, ose në arrati. Pra pjesa e grave ka mbetur e bardhë, e paprekur. Por do sugjeroja që të mos kopjojnë liderët e tyre politike. Shqipëria është lodhur nga gra që sillen si burra dhe bura që sillen si gra, kjo ka qenë pjesë negative që duhet t’i përkasë të shkuarës dhe mos të ketë lidhje më në Parlament”, tha juristi.
Dhe më tej sugjeroi që si shembuj të merren pikërisht liderët politike më me emër të Europës dhe që t’i jepnin fund këtij binomi dhe estabilishmenti politik burrash, pjesa më e madhe e të cilëve tashmë me probleme me drejtësinë.
“Gruaja të bëhet pjesë e udhëheqjes, pasi Europa e qytetëruar me gra si Meloni, Merkel apo Thaçer kanë treguar lidership dhe frymëzim. Përballja me estabilishmentin aktual do të vijë kur të kemi kandidatura apo lidera partish e koalicionesh që do përballen e shpallin kandidaturat për kryeministre dhe ajo do jetë dita që do i japë fundin estabilishmentit aktual. Unë kam eksperiencë në gjykata ku prokurorët dhe gjykatëset femra kishin më shumë rezultat dhe pozitivitet, si dhe sukses. Ato kanë qenë në krye të eficencës, unë pres dhe shpresoj që t’i shikojmë gratë si drejtuese partish apo kryeministre dhe e pres që të ndodhë sa më shpejt, e jo vonë”, u shpreh ai.
Kandidatja e PD-së, Jorida Tabaku, që u la në listat e hapura nga Sali Berisha, po mbledh më shumë vota se gjithë lista e mbyllur e kandidatëve të partisë.
Kështu u shpreh juristi Kreshnik Spahiu në studion e ‘Frontline’ mbrëmjen e sotme (3 prill), në lidhje me përfaqësimin e grave në politikë dhe lidership.
Ai iu referua pikërisht një mesazhi jo të zakonshëm të dhënë ditë më parë nga Silva Turdiu, ish-sportistja dhe ish e fejuara e djalit të Mehmet Shehut në kohën e komunizmit, e cila apeloi për qytetarët e Tiranës dhe të djathtët që të votonin për Tabakun.
“Sot më bëri përshtypje mesazhi i një gruaje të famshme, që ka thyer heshtjen pas 30 viteve, dikur kundër regjimit komunist, ish-sportiste e njohur, Silvia Turdiu, që doli për të thyer heshtjen dhe dhënë mesazh politik për herë të parë. Bëri një thirrje dhe më ka bërë përshtypje, që kërkoi votën publikisht për kandidaten e PD-së Jorida Tabakun, një kandidate e Tiranës. Kam ndjekur rrjetet sociale, unë i përkas pikëpamjeve të ndryshme, por më duhet ta them se Jorida Tabaku ka bërë një fushatë të jashtëzakonshmë në Tiranë. Më duhet ta them se ajo po punon 10 herë më shumë se ata që kanë emrin në listat e sigurta të PD-së. Madje po mbledh vota dhjetë herë më shumë se sa ata që i kanë emrat në listat e sigurta për deputetë”, u shpreh Spahiu për Report Tv.
Ai e përballi këtë situatë edhe me një analizë për gratë anonime në politikën e mazhorancës, që emërohen dhe largohen pa bërë zë. Por vuri në dukje se “gratë socialiste kanë treguar më shumë karakter sesa burrat socialistë”.
“Në krahun tjetër vë re se gratë socialiste kanë treguar më shumë karakter se burrat socialistë. Por jam skeptik për inflacionin politik të grave socialiste dhe përfaqësimin e tyre në Kuvend apo në poste. Ka ministre dhe deputete socialiste ku vijnë si anonime, emërohen si anonime, bëhen ministre si anonime dhe po të ecin në rrugë s’i njeh askush pasi largohen. Nuk flasin asnjëherë në Parlament, ose janë të padukshëm dhe harrohen, s’i mban mend askush. Të emëruarit ministre nuk është qokë, është përgjegjshmëri, se ke fatin e miliona personave në dorë dhe nuk duhet të jesh anonim”, nënvizon juristi mes të tjerash.
Komente
