Për juristin Kreshnik Spahiu, ‘goditjet’ që jep SPAK si majtas edhe djathtas nuk kanë asnjë ndikim tek votuesit e Partisë Demokratike apo Partisë Socialiste. I ftuar në emisionin ‘Frontline’ në Report Tv, Spahiu thotë se votuesit e PD dhe PS nuk ndikohen nga akuzat që SPAK bën për liderët e tyre politikë
“Elektorati shqiptar nuk ndikohet aspak nga SPAK. Qoftë demokratët e socialistët ndikohen zero edhe sikur të ketë 10 akuza për Ramën e 10 akuza për Berishën, demokratët nuk i shkojnë Berishës mbrapa se është i varfër apo i shtresës së mesme, as Ramës se është i ndershëm apo fukara. Nëse do e shohin Berishën në autobus të Laprakës apo Ramën më biçikletë, ata nuk janë më liderë”, tha Spahiu në Report Tv.
Sipas Spahiut, goditjet e SPAK ndikojnë vetëm tek elektorati gri, ndërsa thekon se Prokuroria e Posaçme u heq mundësinë një pjesë të elektoratit të indoktrinuar, që të mbajnë në krye të shtetit njerëz të inkriminuar.
“SPAK po bën atë që ka bërë në shumë vende të Europës Lindore, i heq mundësinë një pjesë të elektoratit të indoktrinuar, që të mbajnë në krye të shtetit njerëz të inkriminuar, SPAK u heq mundësinë shqiptarëve të votojnë Metën, u dogj politikisht. Nuk do jetë më pjesë e politikës. Ditën që dënohet me vendim gjykate i hiqet mundësia të jetë në politikë dhe çdo post. Qëllimi i atyre që e ndërtuan SPAK është për ti hequr mundësinë një shoqërie që vjen nga sistem autoritar, që me shumë vonesë po i kap rregullat e demokracisë, që të nxjerrë jashtë loje disa persona që mbajnë peng pluralizmin. Sikur 10 akuza, edhe sikur në burg ta çojnë Berishën e Ramën. Nga burg gara elektoral do bëhet e njëjtë. Ata që kanë ndarë mendjen për të votuar Berishën, kanë për ta votuar,. Ndikon te elektorati gri, por te militantë demokratë e socialistë akuzat ndaj liderëve politikë ndikojnë zero. PD dhe PS nuk ndryshojnë në raportin e tyre në zgjedhjet e 11 majit, nuk do ketë asnjë ndryshim edhe sikur të arrestohen dy liderët politikë”, tha Spahiu.
Duke komentuar zgjedhjet parlamentare që do të mbahen më 11 maj, juristi Kreshnik Spahiu thotë për Report Tv se Berisha nuk do koalicion opozitar sepse synon që të ngelet vetëm PD parti parlamentare. Në emisionin ‘Frontline’, Spahiu thotë se nëse Berisha do vinte në pikëpyetje mandatin e 4 të Ramës, do thërriste në koalicion çdo parti të re.
“Nëse doni të parashikoni rezultatin e zgjedhjeve, shihni se çfarë lëvizje do bëjë opozita. Ka dy lloj listash që ndërtohen për një parti që pretendon pushtetin, e para është listë hapje ku probabiliteti është shumë i lartë për rotacion politik. Ka edhe një listë të mbyllur, ku një parti është e sigurt që e ka të pamundur fitoren dhe i duhet të maksimalizojë numrin e deputetëve të siglës. Nëse PD e drejtuar nga Berisha do i bëj ofertë Lapajt, Shabanit, Qorit, Shehajt, Alibeajt, Bashës, çdo lloj subjekti përveç PS, atëherë ta dini që Berisha është i bindur që ka një mundësi për të ardhur në pushtet. Nëse do vinte në pikëpyetje marrjen e mandatit të katërt, atëherë do i bënte oferta partive të tjera”, tha Spahiu.
Sipas Spahiut, rezultati i zgjedhjeve të 11 majit do jetë historik, sepse PS dhe PD do zhbëjnë partitë e tjera të vjetra dhe do u heqin shanset edhe partive të reja.
“Në bindjen time rezultati mund të ketë ulje të votave të PS dhe PD, por PS dhe PD do shënojnë rekord historik në sistemin dy partiak në 11 maj, në 35 vite sepse do zhbëjnë partitë e tjera që kanë qenë të vjetra dhe do u heqin mundësinë edhe partive të reja. Partia çame s’do ketë më mundësinë të këtë 4 deputetë, partia e LSI tani është inekzistente, tani do fusë në deputet vetëm metën për qokë dhe s’do jetë me subjekt politik. 2025 do jetë koalicioni i ardhshëm anti-SPAK, Rama, Berisha, Meta që kanë një interes për t’iu kundërvënë SPAK”, tha Spahiu.
Komente
