Deputeti demokrat, Edmond Spaho ka zbuluar detaje lidhur me takimet e kryera në Bundestagun gjerman, tre vjet më parë, kur opozita e bashkuar vendosi të digjte mandatet.
Ai tregoi për premtimet “boshe” të kreut të Partisë Demokratike, Lulzim Basha i cili në atë kohë siguroi se nuk do t’i digjte mandatet, duke shtuar se ai jo vetëm nuk po merr përgjegjësinë e veprimeve të tij, por edhe po manipulon opinionin publik.
Deputeti demokrat tha se Basha pati mundësinë të takojë jo vetëm drejtuesit më të rëndësishëm të CDU/ CSU në Bundestag, po edhe me njerëz shumë të rëndësishëm të kabinetin të Merkel.
Ai shtoi se në 2018, duke qenë se ishte kreu i Grupit parlamentar të PD, në ambientet e Kuvendit ku edhe u takua me Susan Falatko, Drejtoreshën e Evropës Qendrore dhe Lindore ne DASH, e siguroi në emër të kryedemokratit se ai as nuk e kishte në mëndje të digjte mandatet.
Detajet e reja lidhur me prapaskenat e djegies së mandateve vijnë pas një deklarate të kryetares së LSI, Monika Kryemadhi se ishte një vendim ekstrem dhe i paprecedentë në politikën shqiptare, duke shtuar se ishte PD i kishte premtuar se "kancelarja gjermane Angela Merkel dhe Partia Popullore Evropiane do të përshëndeste vendimin e opozitës për djegien e mandateve".
J.GJ./ReportTv.al
