TIRANE- Ish zv/kryeministri Arben Ahmetaj merret i pandehur për aferën me inceneratorin e Elbasanit. Prokuroria e Posaçme nisi sot komunikimin e akuzave ndaj Arben Ahmetajt, Klodian Zotos dhe Mirel Mërtirit, lidhur fraksionin e ndarë të inceneratorit të Elbasanit.
Ahmetaj është nën hetim për procedimin penal 277/1 për veprat penale “mosdeklarim, deklarim të rremë dhe fshehje të pasurisë”, vetëm dhe në bashkëpunim, “Korrupsion pasiv të funksionarëve të lartë shtetërorë ose të zgjedhurve vendorë” në gjashtë raste, “Pastrimit të produkteve të veprës penale ose veprimtarisë kriminale”. Ai dyshohet se ka ndërmarrë një mori aktesh, në funksionet e tij si ministër, për t’i mundësuar këtyre sipërmarrësve lidhjen e kontratave koncensionare.
Sot në SPAK u thirrën avokatët për për tiu komunikuar akuzat në ngarkim të klientëve të tyre. Rrethi i të pandehurve pritet të jetë dhe më i gjerë, ndërkohë avokati i i Klodian Zotos, Ardian Leka informoi për gazetarët se personave të tjerë të marrë të pandehur në këtë dosje do u komunikohet akuza më 26 mars.
Lefter Koka u denua me 5.8 vite burg
Lidhur procedimin e parë për grupin e zyrtarëve mes të cilëve edhe ish-ministri i mjedisit Lefter Koka, GJKKO ka përfunduar gjykimin duke dhënë edhe dënimet përkatëse. Në tetor 2023 Ish-ministri i mjedisit Lefter Koka u dënua me 5 vjet e 8 muaj burg si dhe iu sekuestruan aksionet në kantinën e pijeve në Durrës në vlerën e korrupsionit, 3.7 milionë euro. Për të njëjtën çështje, ish-deputeti Alqi Bllako u shpall i pafajshëm. Në total, GJKKO dha 33 vjet burg për tetë të pandehurit e kësaj dosjeje.
Ahmetaj në kërkim Prej 24 korrikut 2023 Arben Ahmetaj vijon të jetë në kërkim ndërkombëtar . SPAK, në dosjen dorëzuar parlamentit në korrik të vitit të kaluar - kur i kërkoi parlamentit autorizim për arrestimin e tij - vinte në dukje transaksione financiare me shitje-blerje pasurish të patundshme, të shtrira ndër vite, që pas të cilave qëndronin dy sipërmarrësit e inceneratorëve Klodian Zoto dhe Mirel Mërtiri.
Kjo është hera e dytë që Prokuroria e Posaçme SPAK ka marrë të pandehur në mungesë ish zvkryeminstrin Arben Ahmetaj, pas privatizimit të ish-ndërmarrjes shtetërore fabrikës “Buka.sha” në tetor 2023.
Ndërkohë në janar 2024 u mësua se Ahmetaj kishte kontraktuar një kompani lobuese 'Prism Group' kundrejt 150 mijë dollarëve për të informuar politikbërësit amerikanë “mbi akuzat e rreme” të ngritura ndaj tij në Shqipëri. Nga kontrata u zbulua se ai jetonte në Lozano të Zvicrës.
Report TV mëson se e pandehur do të merret dhe ish bashkëshortja e ish zv/kryeministrit Arben Ahmetaj.
Mësohet se fletëthirrja për tu paraqitur që ti komunikohet akuza në SPAK i është dërguar edhe Albina Mançka.
Ende nuk dihet akuza që do ti komunikohet, teksa emri i saj zë vend të konsiderueshëm në dosjen hetimore të SPAK sa i takon pasurisë tjetërsimit të pronave apo faturave të majme të pajustifikuara për investime në apartamente dhe vilën në Palasë.
