BARCELONË - Gjykata e Lartë e Drejtësisë e Katalonjës ka pranuar ankesën e ish-futbollistit Dani Alves kundër dënimit të tij me katër vjet e gjysmë burg për sulm seksual ndaj një gruaje në një klub nate të Barcelonës.
Gjykata e rrëzoi dënimin sepse beson se nuk ka prova të mjaftueshme për të "tejkaluar standardet e kërkuara nga prezumimi i pafajësisë". Vendimi i kësaj të premteje, i cili mund të apelohet, nënkupton shfajësimin e futbollistit.
HISTORIA - Alves u shpall fajtor në shkurt 2024 për përdhunimin e një gruaje në një klub nate në dhjetor 2022 dhe u dënua me katër vjet e gjashtë muaj burg. Ai mohoi keqbërjen gjatë gjyqit tre-ditor. Ish-ylli i Brazilit dhe Barcelonës u lirua nga burgu në mars 2024, ndërsa priste që apeli i tij të dëgjohej nga një gjykatë më e lartë.
Ishte Gjykata e Barcelonës ajo që e dënoi ish-futbollistin brazilian në shkurt të vitit 2024 për ngjarjet e ndodhura natën e 30 dhjetorit 2022. Kur u shpall vendimi, Alves, i cili kishte kaluar më shumë se një vit në paraburgim, u dënua me 4 vite e gjysmë burg, 5 vite mbikëqyrje pas lirimit dhe 9 vite ndalim afrimi ndaj “viktimës”.
Gjithashtu, u vendos që braziliani t’i paguante “viktimës” një dëmshpërblim prej 150.000 eurosh. Tani, dhoma e apelit e Gjykatës së Lartë të Drejtësisë së Katalonjës, e përbërë nga tre gra dhe një burrë, ka vlerësuar se dëshmia e “viktimës” nuk është “e mjaftueshme për të mbajtur në fuqi dënimin e të akuzuarit dhe se në këtë rast mbizotëron e drejta për prezumimin e pafajësisë”, ka raportuar “Cadena SER”.
Sipas të njëjtit burim, dhoma penale e Gjykatës së Lartë argumenton se “dëshmia e viktimës nuk është e mjaftueshme për të kundërshtuar prezumimin e pafajësisë”. Edhe një herë, arsyeja kryesore lidhet me regjistrimet e kamerave të sigurisë, të cilat ishin analizuar dhe komentuar gjerësisht edhe më parë.
Komente
