Fushata për mbrojtjen e Lumit Vjosa ka nisur që nga viti 2013 e një vit më pas mori edhe vëmendjen e medieve ndërkombëtare. Hidrocentrali i parë në Vjosë, është ai i Kalivaçit, leja e të cilit daton që në vitin 1997. Ndërtimi i digës filloi në 2007, por është ndaluar disa herë. Hidrocentrali i dytë më i madh në Vjosë është ai i Poçemit dhe diga e tij ishte planifikuar të ndërtohej afër fshatit Poçem.
Propozimi i 45 digave në Vjosë, 8 në lumin kryesor dhe 37 në degët e tij, sipas shoqatave dhe organizatave ambientaliste do të shkatërronin sistemin lumor. Kështu nisën protestat e para dhe ankimimet në gjykata vit pas viti.
Në pranverën 2023, Vjosa ka zyrtarisht statusin Park Kombëtar, ç’ka do të thotë se nuk do të lejohet asnjë lloj ndërtimi që cenon lumin Vjosa dhe siç shprehen ambientalistët, lumi do të rrjedhë i lirë, “ari” i hidrocentraleve do të jetë pasuri për brezat e ardhshëm. Në këtë dokumentar ndiqni një kronologji të rrjedhës së fatit të Lumit të fundit të egër të paprekur të Evropës.
