Kryetarja e Kuvendit, Elisa Spiropali, u takua me kryetarët e parlamenteve të Turqisë, Australisë dhe Azerbajxhanit ditën e sotme.
Gjatë pjesëmarrjes në sesionin e 149 të Asamblesë së Unionit Ndër-Parlamentar në Gjenevë, Kryetarja e Kuvendit, u takua me Kryetarin e Asamblesë së Madhe Kombëtare të Turqisë, Numan Kurtulmuş, Kryetarin e Dhomës së Përfaqësuesve të Australisë, Milton Dick, dhe Kryetaren e Parlamentit të Azerbajxhanit, Sahiba Gafarova.
Me kryeparlamentarin turk Kurtulmuş, Spiropali bisedoi mbi partneritetin strategjik, bashkëpunimin në NATO, marrëdhëniet e shkëlqyera dypalëshe, miqësinë mes popujve tanë dhe bashkëpunimin mes Kuvendit dhe Asamblesë së Madhe Kombëtare për nxitjen e këtyre marrëdhënieve.
"Me Kryetarin e Dhomës së Përfaqësuesve të Australisë, Milton Dick, Spiropali diskutoi mbi zgjerimin e marrëdhëniet dypalëshe dhe intensifikimin e bashkëpunimit parlamentar", njoftoi zyra e shtypit të Parlamentit.
Ndërsa, me kryetaren e Parlamentit të Azerbajxhanit, Sahiba Gafarova, u diskutua mbi bashkëpunimin parlamentar si nxitës i marrëdhënieve dypalëshe, bashkërendimin e qëndrimeve të përbashkëta në organizatat dhe forumet ndërkombëtare dhe rikonsiderimin e kërkesës për njohjen e Kosovës.
