Kryeministri i Britanisë, Keir Starmer ka thënë se është i gatshëm të vendosë trupat e Mbretërisë së Bashkuar në terren në Ukrainë për të ndihmuar në garantimin e sigurisë së saj si pjesë e një marrëveshjeje paqeje.
Kryeministri i Mbretërisë së Bashkuar tha se sigurimi i një paqeje të qëndrueshme në Ukrainë është thelbësore nëse duam ta pengojmë Putinin nga agresioni i mëtejshëm në të ardhmen. Përpara se të merrte pjesë në një samit urgjent me liderët evropianë në Paris të hënën, Starmer tha se Mbretëria e Bashkuar ishte e përgatitur të kontribuonte në garancitë e sigurisë për Ukrainën duke “vendosur trupat tona në terren nëse është e nevojshme”.
“Por çdo rol në ndihmën për të garantuar sigurinë e Ukrainës po ndihmon për të garantuar sigurinë e kontinentit tonë dhe sigurinë e këtij vendi. Fundi i luftës së Rusisë me Ukrainën kur të vijë, nuk mund të bëhet thjesht një pauzë e përkohshme përpara se Putin të sulmojë përsëri”, tha ai.
Trupat e Mbretërisë së Bashkuar mund të vendosen së bashku me ushtarë nga vendet e tjera evropiane përgjatë kufirit midis territorit të mbajtur nga ukrainas dhe territorit të mbajtur nga Rusia. Kryeministri më parë ka lënë të kuptohet vetëm se trupat britanike mund të përfshihen në mbrojtjen e Ukrainës pas një armëpushimi.
Ai do të vizitojë Presidentin Donald Trump në Uashington më vonë këtë muaj dhe tha se “garancia e sigurisë së SHBA është thelbësore për një paqe të qëndrueshme, sepse vetëm SHBA mund ta pengojë Putinin të sulmojë përsëri”.
Komente
