Ministri i Brendshëm Ervin Hoxha priti sot (1 gusht) ambasadorin e Britanisë së Madhe në Tiranë, Nick Abbot.
Pas takimit, Hoxha bëri edhe një postim në rrjetin social, ku shpjegoi detajet e bisedës, ndër më kryesoret edhe strartegjia dhe bashkëpunimi në rikuperimin e aseteve të përfituara nga veprimtaria kriminale, që sekuestrohen.
"Prita sot në një takim të frytshëm ambasadorin e Britanisë së Madhe në Tiranë, Nick Abbot. Bashkëbisedimi u përqendrua në bashkëpunimin e vazhdueshëm mes dy vendeve në fushën e sigurisë, në kuadër të Planit të përbashkëta të Masave, “Dialogu kundër Krimit të Organizuar dhe Krimeve të Rënda”, me theks të veçantë te prioriteti strategjik i rikuperimit të aseteve të përfituara nga veprimtaria kriminale”, shkruan ministri.
Më tej ai thekson se funksionalizimi i Zyrës së Rikuperimit të Aseteve është një nga rekomandimet kyçe të Bashkimit Europian dhe një element thelbësor i axhendës së integrimit. Në këtë drejtim, Ministria e Brendshme ka përfituar mbështetje të vazhdueshme nga partnerët.
“Mbështetja e Mbretërisë së Bashkuar në këtë fazë është një kontribut i çmuar për konsolidimin e këtij mekanizmi të ri institucional, si pjesë e zbatimit të Strategjisë Kombëtare kundër pastrimit të parave dhe financimit të terrorizmit 2024–2030”, shprehet Hoxha.
Më tej jep edhe pikat e diskutimit dhe mundësitë e zgjerimit të mbështetjes.
“Diskutuam për mundësitë e zgjerimit të kësaj mbështetjeje, përmes:
-trajnimeve të avancuara për ekspertët e ZRA dhe bashkëpunëtorët institucionalë;
-mbështetjes për takime operacionale ndërkombëtare dhe rajonale;
-ndërtimit të kanaleve të drejtpërdrejta me homologët britanikë;
-zhvillimit të databazës analitike të rasteve të ZRA, në përputhje me standardet më të mira britanike.
Shqipëria mbetet plotësisht e angazhuar për të çuar përpara këtë proces jetik për forcimin e sundimit të ligjit dhe goditjen e krimit të organizuar, përmes ndjekjes së parave me burim të paligjshëm", përfundoi ministri reagimin e tij.
Komente
