Në një nismë të rëndësishme humanitare, Qendra Kombëtare e Transfuzionit të Gjakut zhvilloi sot një aktivitet në ambientet e Universitetit “Aleksandër Moisiu” në Durrës, duke sjellë njësinë e saj lëvizëse për të mundësuar dhurimin e gjakut nga studentët.
Kjo fushatë synon të rrisë ndërgjegjësimin e të rinjve për rëndësinë e dhurimit vullnetar të gjakut dhe për të forcuar rezervat kombëtare të gjakut që janë jetike për trajtimin e mijëra pacientëve në spitale.
Aktiviteti u organizua në bashkëpunim me drejtues të universitetit dhe përfshiu informim të studentëve mbi procesin e dhurimit, kriteret për të qenë një dhurues i sigurt dhe përfitimet që sjell kjo nismë si për shëndetin personal, ashtu edhe për komunitetin.
Shumë studentë iu përgjigjën pozitivisht thirrjes dhe dhuruan gjak në njësinë e specializuar të ngritur pranë ambienteve të kampusit.
Qendra Kombëtare e Transfuzionit të Gjakut është institucioni përgjegjës për menaxhimin dhe sigurimin e një sistemi efikas dhe të sigurt të transfuzionit të gjakut në të gjithë vendin. Fushatat e saj ndërgjegjësuese janë të shpeshta në universitete, shkolla të mesme, institucione publike dhe private.
Komente
