Në fund të vitit Buxheti i Shtetit është korrigjuar për herë të dytë, për t’u lënë vend dy ndryshimeve të rëndësishme. Së pari, qeveria ka vendosur që të rritë fondet për arsimin universitar. Dhe, së dyti, janë rritur shumë edhe shpenzimet në favor të infrastrukturës rrugore.
Në mbledhjen e Këshillit të Ministrave të datës 19 dhjetor, qeveria ka miratuar një Akt Normativ, që ndryshon sërish shifrat e Buxhetit të Shtetit për vitin në vazhdim, pasi në korrik ishte bërë edhe një ndryshim i parë. Ajo që bie në sy është se, me përjashtim të Kryeministrisë dhe ministrisë së Kulturës, që njohin një rritje fondesh, dikasteret e tjera duhet të mjaftohen me më pak fonde sa sa u njihej me ligjin e miratuar nga Kuvendi në fund të vitit të kaluar për 2018-ën.
Akti Normativ ka fuqinë e ligjit dhe zbatohet si i tillë, por duhet të miratohet më pas nga Kuvendi në seancat e vitit të ardhshëm.
Të privilegjuarit
Sipas Aktit Normativ, të ardhurat në total janë parashikuar në nivelin e 461.9 miliardë lekëve, në ulje prej 0.6 përqindësh nga parashikimi fillestar prej 464.7 miliardë lekësh. Në të njejtën masë parashikohet edhe ulja e shifrës së shpenzimeve buxhetore, që arrijnë në 494.2 miliardë lekë, nga 497.1 miliardë lekë, ndërkohë që deficiti buxhetor parashikohet të mbetet i pandryshuar me 32.4 miliardë lekë.
Nga dikasteret kryesore, Kryeministria merr përfudnimisht 1.1 miliardë lekë, nga 960 milionë të parashikuara në Ligjin për Buxhetin e Shtetit 2018, ndërkohë që 2.2 miliardë merr ministria e Kulturës, e cila parashikohej të financohej me 2 miliardë nga Buxheti.
Ndërkohë, Arsimi i Lartë do të njohë një rritje financimi duke filluar që nga ky vit. Pas protestave të studentëve dhe dialogut të kryeministrit Edi Rama me ta, nga 7.2 miliardë lekë të planifikuara, ky sektor do të financohet me 400 milionë lekë më shumë, ose 3 milionë euro shtesë, për të arritur në një fond në masën 7.6 miliardë lekë.
Por një rritje shumë më të lartë do të ketë sektori i infrastrukturës rrugore, ku janë në punim e sipër mjaft segmente nacionale. Nga 14 miliardë të planifikuara, shifra arrin në 23.7 miliardë, me një rritje prej 70 për qindësh.
“Të goditurit”
Ndërkohë, Presidenca e Republikës si institucion do të ketë një fond në masën 243.8 milionë lekë, nga 247.5 milionë të parashikuara; Kuvendi 1 miliard e 61 milionë lekë, nga 1.2 miliardë të planifikuara; Bujqësia 9.3 miliardë, nga 11 miliardë të planifikuara, etj.
Në ulje janë edhe buxhetet sektoriale të Mbrojtjes, ministrisë së Brendshme, Drejtësisë, Financave në përmasa të ndryshme.
Duket se, përveç të të ardhurave, që kanë qenë më të pakta nga parshikimi fillestar, në këtë mënyrë Akti Normativ i qeverisë në prag të fundvitit ka bërë edhe një rishpërndarje të fondeve në dispozicion, duke tërhequr fonde nga dikasteret e tjera në favor të Arsimit të Lartë, Rrugëve dhe vetë aparatit të Këshillit të Ministrave.
Ndryshimet e parashikuara në Buxhetin e Shtetit 2018 me Aktin Normativ të datës 19 dhjetor 2018
Institucioni Ligji fillestar Akti Normativ
Presidenca 247.5 milionë lekë 243.8 milionë lekë
Kuvendi 1.19 miliardë lekë 1.06 miliardë lekë
Kryeministria 960 milionë lekë 1.1 miliardë lekë
Bujqësia 11 miliardë 9.3 miliardë
Infrastruktura 47.6 miliardë 47.6 miliardë
Financa 60.9 miliardë 54.1 miliardë
Arsimi 38.4 miliardë 38.3 miliardë
Kultura 2 miliardë 2.2 miliardë
Shëndetësia 60.1 miliardë 59.1 miliardë
Drejtësia 10.5 miliardë 10.4 miliardë
Jashtme 3 miliardë 2.8 miliardë
Brendshme 21.1 miliardë 20.1 miliardë
Mbrojtja 19.8 miliardë 19.3 miliardë
Turizmi 2.3 miliardë 2.2 miliardë
Kërkesa e parë nga tetë të kërkuara nga studentët gjatë protestës së tyre ishte edhe rritja e buxhetit në 5% e GDB me qëllim mundësimin e përgjysmimit të tarifës së studimit për cdo nivel studimi, përmirësim e mësimdhënies dhe infrastrukturës (universitete dhe konvikte).
Për të mësuar të gjitha kërkesat e studentëve dhe propozimet e kryeministrit Rama (LEXO KËTU)
Komente
MOs se na vodhen leket tona te tera Monika,Dhori dhe Mynyr Koni
Përgjigju