GREQI- Stuhia “Medea” e shoqëruar me dëborë, erë, temperatura të ulëta dhe ngrica e cila ka pushtuar territorin e Greqisë, për pasojë rruga nacionale Athinë-Lamia është bllokuar dhe është ndaluar qarkullimi i automjeteve.
Autoritetet përkatëse në Greqi lajmëruan se vala e parë e motit të keq ka kaluar fillimisht mbi Greqinë veriore dhe po drejtohet me shpejtësi në pjesën jugore të vendit.
Pritet që reshjet e dëborës të vijojnë me intensitet të lartë dhe vetëm ditën e mërkurë situata do të përmirësohet.
Temperaturat kanë arritur në disa zona si Kastoria deri në -20 gradë, duke vijuar me Neos Kavkasos (-17,1), Lugina e Kozanit (-15,9), Vounasa Grevena (-14,4), Terpillos Kilkis (-14,2), Florina (-13,7) dhe Efkarpia (-13).
Orë të vështira po kalojnë banorët në disa zona të Greqisë, ku përvec dëborës dhe ftohtit të acartë i mungon edhe energjia elektrike Skiathos, Skopelos dhe Alonissos janë disa prej vendeve më të prekura.
Autoritete përkatëse në të gjithë vendin janë mobilizuar për pastrimin dhe kriposjen e rrugëve me qëllim shmangien e problemeve në qarkullim, por në disa zona kjo është ende e pamundur pasi reshjet nuk kanë pushuar.
