Turqia ka befasuar Austrinë, duke e eliminuar në 1/8 e Evropianit dhe është bërë përfaqësuesja e fundit që siguron një biletë në çerekfinale. Në Leipzig ekipi i drejtuar nga Montella fitoi me rezultatin 2-1, ndërsa zhbllokoi shifrat që në minutën e parë me Demiral, duke vendosur rekord për shpejtësinë në ndeshjet me eliminim direkt.
Nga ky moment Austria u përpoqë gjatë që të barazonte, por në asnjë moment nuk e gjeti rrugën e rrrjetës. Në minutën e 59 Demiral shtangu sërish austriakët, duke shënuar një gol të rëndë për kualifikimin.
Megjithatë nuk kaloi shumë dhe përfaqësuesja e drejtuar nga Rangnick shkurtoi diferencat me Gregoritsh, duke rihapur edhe një herë llogaritë për kualifikimin. Deri në limitet e shtesës Austria tentoi të barazonte, madje në një rast portieri i Turqisë bëri mrekullinë, ndërsa në fund ishin turqit që prenë biletën mes 8 më të mirëve.
