Udhëheqësi suprem i Iranit, Ajatollah Ali Khamenei këmbëngul se SHBA-të nuk kanë arritur asnjë gjë nga sulmet ndaj objekteve bërthamore, raporton BBC. Këtë deklaratë ai e bëri në fjalimin e tij të parë publik që kur u arrit armëpushimi me Izraelin të martën, i ndërmjetësuar nga Donald Trump.
Khamenei tha se sulmet nuk “arritën asgjë domethënëse” për të prishur programin bërthamor të Iranit dhe e përshkroi hakmarrjen kundër një baze ajrore amerikane në Katar si një “goditje të rëndë”. Sipas tij, Trump e kishte “ekzagjeruar” ndikimin e sulmeve, duke shtuar.
“Ata nuk mundën të arrinin asgjë dhe nuk e arritën objektivin e tyre”, tha Khamenei.
Duke iu referuar sulmit në bazën ajrore amerikane në Katar, Khamenei tha:
"Ky incident është i përsëritshëm edhe në të ardhmen, dhe nëse ndodh ndonjë sulm, kostoja për armikun dhe agresorin padyshim do të jetë shumë e lartë."
Ndërkohë, Sekretari amerikan i Mbrojtjes, Pete Hegseth, deklaroi se inteligjenca e mbledhur nga SHBA-të dhe Izraeli tregonte se operacioni "dëmtoi ndjeshëm programin bërthamor, duke e shtyrë atë prapa me vite". Më herët, edhe Trump pretendoi se sulmet kundër centrifugave bërthamore brenda Iranit “i zhdukën plotësisht ato” dhe kritikoi raportimet se dëmi mund të ishte më i vogël sesa thuhej.
Duke folur së bashku me gjeneralin e lartë Dan Caine në një konferencë për shtyp në Pentagon, Hegseth tha se misioni ishte një "sukses historik" që i kishte "bërë impiantet [iraniane] të pasurimit të uraniumit të paoperueshme".
Khamenei, i cili qëndroi larg vëmendjes së publikut që nga shpërthimi i konfliktit të drejtpërdrejtë me Izraelin më 13 qershor, lëshoi një fjalim televiziv të enjten, duke i dhënë fund heshtjes publike njëjavore. Udhëheqësi suprem thuhet se është strehuar në një bunker dhe ka kufizuar komunikimet, gjë që ka ngjallur spekulime rreth vendndodhjes së tij.
Autoritetet iraniane nuk zbuluan se nga po fliste ai të enjten, megjithëse një zyrtar i lartë pranoi se ai ishte në një vend të sigurt në fillim të kësaj jave.
Komente
le te zgjedhim ciles propagande te besojme se te dyja jane propaganda, dhe asnjeres nuk i pleqen e verteta
PërgjigjuDhe kush është e vërteta? Të paktën na e thuaj ti