Këshilli i Ministrave ka miratuar ditën e sotme një fond shtesë për organizimin e samitit më 16 maj në Tiranë, ku do të zhvillohet takimi i Komunitetit Politik.
Ministrisë së Brendshme i shtohet fondi prej 92.8 milionë lekësh i ndarë në dy zëra. Policia e Shtetit merr 44.1 milionë lekë dhe Garda e Republikës 48.6 milionë lekë.
Ndërsa Drejtorisë së Shërbimeve Qeveritare i shtohet fondi prej 360 milionë lekë. Vendimi i qeverisë përcakton se efekti financiar prej 452.8 milionë lekësh përballohet nga fondi rezervë i buxhetit të shtetit, miratuar për vitin 2025.
Vendim për një shtesë fondi në buxhetin e vitit 2025, miratuar për ministrinë e brendshme dhe drejtorinë e shërbimeve qeveritare, për përballimin e shpenzimeve të organizimit të takimit të nivelit të lartë të komunitetit politik evropian (epc), të datës 16 maj 2025.
Në mbështetje të nenit 100 të Kushtetutës, të neneve 5 e 45, të ligjit nr.9936/2016, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 14, të ligjit nr.115/2024, “Për buxhetin e vitit 2025”, me propozimin e ministrit të Financave, Këshilli i Ministrave
Vendosi: 1. Në buxhetin e miratuar për vitin 2025, për përballimin e shpenzimeve të organizimit të Takimit të Nivelit të Lartë të Komunitetit Politik Evropian (EPC), që do të organizohet në Tiranë, në datën 16 maj 2025, bëhet shtesë fondi, si më poshtë vijon: a) Ministrisë së Brendshme, fondi prej 92 828 000 (nëntëdhjetë e dy milionë e tetëqind e njëzet e tetë mijë) lekësh, i ndarë: i. Për programin “Policia e Shtetit”, në zërin “Shpenzime korrente”, fondi prej 44 168 000 (dyzet e katër milionë e njëqind e gjashtëdhjetë e tetë mijë) lekësh;
ii. Për programin “Garda e Republikës”, në zërin “Shpenzime kapitale”, fondi prej 48 660 000 (dyzet e tetë milionë e gjashtëqind e gjashtëdhjetë mijë) lekësh. b) Drejtorisë së Shërbimeve Qeveritare, fondi prej 360 045 000 (treqind e gjashtëdhjetë milionë e dyzet e pesë mijë) lekësh.
Efekti financiar, prej 452 873 000 (katërqind e pesëdhjetë e dy milionë e tetëqind e shtatëdhjetë e tre mijë) lekësh, përballohet nga fondi rezervë i buxhetit të shtetit, miratuar për vitin 2025. Ngarkohen Ministria e Financave, Ministria e Brendshme dhe Drejtoria e Shërbimeve Qeveritare për zbatimin e këtij vendimi.
Komente
