Presidentja e Kosovës Vjosa Osmani i propozoi qeverisë së Kosovës të heqë tarifën doganore 10% në fuqi për mallrat e importuar nga SHBA. Kërkesën ajo e njoftoi në rrjete e saj sociale. Ajo ndjek miratimin e tarifave doganore nga Donald Trump me të paktën 10 përqind për 180 shtete në botë përfshirë edhe Kosovën. Osmani e konsideron këtë veprim një pozicionim të duhur diplomatik.
“Jam e bindur se kjo lëvizje do të hapë mundësi të reja për krijimin e vendeve të punës, shkëmbimin e teknologjisë dhe rritjen ekonomike afatgjatë. Më shumë se një lëvizje ekonomike, ky është një objektiv i politikës së jashtme, duke riafirmuar përkushtimin tonë të qëndrueshëm ndaj aleancës Kosovë-SHBA, e ndërtuar mbi vlerat e përbashkëta të lirisë dhe dekada të mbështetjes së palëkundur”, tha Osmani.
Ministri i Financave Hekuran Murati, reagoi me tone kritike ndaj kërkesës së Osmanit. Sipas tij kërkesa shkel kompetencat e ekzekutivit dhe se nuk duhej të ishte bërë publike menjëherë pas paraqitjes zyrtare të saj.
“Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financat. Çështja e marrëveshjes për tregti të lirë është përsëritur nga Kryeministri Kurti edhe në takimet që ka zhvilluar me ish ambasadorin amerikan Hovenier”, u shpreh Murati.
Në presidencën e Kosovës reagimin e ministrit të financave e cilësuan skandaloz.
“E turpshme, skandaloze, me mungesë respekti bazik institucional e me mungesë të njohurive bazike se si udhëhiqet shteti e mbi të gjitha me mungesë të gatishmërisë minimale që të punohet e bashkëpunohet në interes të Kosovës është deklarata e tij e sotme. Hiqni tarifat e paarsyeshme ndaj aleatit tonë kryesor, dhe lërini deklaratat e turpshme dhe fëminore”, u shpreh Bekim Kupina, këshilltar për mediat në Presidencën e Kosovës.
Komente
