Numri i punonjësve të huaj që kanë ardhur në Shqipëri po vjen gjithnjë e në rritje sidomos këtë vit që janë lehtësuar edhe kushtet për të marrë lejen e punësimit.
Një tjetër formë e marrjes së fuqisë punëtore nga jashtë është edhe nëpërmjet kontratës me një agjenci të huaj, për një numër të caktuar punonjësish. Deri më tani kjo formë e punësimit dhe e krijimit të të ardhurave nuk ka qenë taksuar por me ndryshimet e reja ligjore edhe kjo kategori do të jetë pjesë e tatimit mbi të ardhurat nga punësimi.
“Rastet kur agjenci të huaja i ofrojnë entiteteve juridike shqiptare fuqi punëtore nga jashtë, por pagesa e fuqisë punëtore i bëhet agjencisë së huaj sipas kontratës, tatimi që llogaritet dhe mbahet si tatim mbi pagën do të jetë jo më pak se 80% e tarifës totale që është paguar nga entiteti shqiptar për agjencinë e huaj të punësimit”, thuhet në udhëzimin që shpjegon subjektet dhe tatimpaguesit që do të bëhen pjesë e skemës së re të tatimit prej vitit të ardhshëm.
