Rreth 90 për qind e individëve kanë plotësuar Deklaratën Individuale Vjetore të të Ardhurave për vitin 2024 (DIVA). Drejtoria e Përgjithshme e Tatimeve njofton se bëhet fjalë për 127.381 individë që kanë plotësuar formularin e DIVA nga 143.369 që e kishin detyrimin për të deklaruar të ardhurat vjetore.
Sipas Tatimeve, të gjithë individët që nuk e kanë plotësuar ende mund të bëjnë deklarimin e DIVA sa më shpejt për të shmangur gjobat. Afati i fundit për plotësimin e DIVA 2024 ishte 31 marsi, por Drejtoria e Tatimeve e shtyu më 1 prill për shkak se e hëna ishte pushim zyrtar nga festa e Fitër Bajramit.
"Nga të dhënat e Administratës Tatimore, rreth 90% e individëve subjekt deklarimi për DIVA kanë dorëzuar deklaratën si për vitin 2023, ashtu dhe për vitin 2024.
DIVA 2024
Nga 143.369 individë që duhet të deklaronin, deklaruan 127.381 individë
DIVA 2023
Nga 73.850 individë që duhet të deklaronin, deklaruan 65.910 individë
Administrata Tatimore fton individët që nuk kanë deklaruar ende, të bëjnë deklarimin e DIVA sa më shpejt për të shmangur gjoba dhe interesa të panevojshme”, njofton Drejtoria e Përgjithshme e Tatimeve.
Kategoritë që kanë detyrimin për plotësimin e DIVA 2024 janë individët me të ardhura bruto vjetore mbi 1,2 milionë lekë në vit, nga mbi 2 milionë lekë që ishte kufiri i mëparshëm. Ulja e pragut të detyrimit për deklarim për të punësuarit në Shqipëri u ul pas hyrjes në fuqi të ligjit “Për tatimin mbi të ardhurat”.
Detyrimin për DIVA-n 2024 e kanë edhe ata që kanë të ardhura deri 50 mijë lekë të patatuara të fituara nga të ardhurat nga qira ditore, Air Bnb apo Booking. Për individët që janë në marrëdhënie punësimi, me më shumë se një punëdhënës, mënyra e plotësimit dhe dorëzimit të DIVA-s 2024 nuk ndryshoi.
Pra të dypunësuarit do të vijojnë të kenë detyrimin të plotësojnë deklaratën pavarësisht nëse e arrijnë kufirin prej 1,2 milionë lekë në vit apo kanë realizuar të ardhura nën këtë nivel.
Të dhënat e publikuara nga Tatimet
Komente
Po mire pse tatimet nuk i dergojne lajmerim personave qe e kane kaluar fashen qe detyron te deklarosh? Mbase ky 10% ska dijeni??? Nese tatimet i kane informacionet per te gjobitur personat qe kane kaluar fashen, pse nuk i lajmerojne por presin tu vendosin gjobe???
Përgjigju