Receta e parë: Japrak me gjethe rrushi
Përbërësit:
50 gjethe rrushi
1 tufë qepë të njoma
1 qepë e vogël e thatë
1 tufë majdanoz
1 tufë lëpjetë
1 tufë labot
1 tufë kopër
1 tufë nenexhik
2 hudhra të njoma
1 gotë oriz
80 gr vaj ulliri
Kripë dhe piper i zi
Përgatitja:
Fillimisht lajmë të gjitha jeshilllëqet me ujë të bollshëm. Shpëlajmë orizin dhe e lëmë pak në ujë të ngrohtë 20-30 minuta. Vendosim një tenxhere me ujë të valuar dhe ziejmë gjethet e rrushit për 2-3 minuta. Ndërkohë grijmë imët erzat, presim bishtat e qepëve në unaza të holla, po ashtu dhe hudhrat e njoma.
Në një tigan ngrohim pak vaj dhe kaurdisim 1 qepë të thatë dhe të bardhat e qepëve të njoma deri sa qepët të zbuten.
Bishtat e qepëve i vendosim në një tas dhe pasi shtojmë pak kripë, i shtypim lehtë me dorë. Shtojmë barishtet e tjera dhe përsëri i shtypim lehtë me dorë duke shtuar në tas kripë, piper, arrë moskat, 3 lugë gjelle vaj ulliri dhe oriz. I përziejmë mirë të gjithë përbërësit duke shtuar dhe qepën e kaurdisur. Vendosim në dërrasën e punës 1 gjethe rrushi. Vendosim në fillim të saj (nga ana e bishtit)1 lugë gjelle mbushje. Kthejmë në fillim 2 pjesët anësore të gjethes majtas dhe djathtas. I bashkojmë në qendër dhe më pas e rrotullojmë japrakun.
Në tenxhere vendosim në fund të saj disa gjethe rrushi. Më pas vendosim japrakët njëri pas tjetrit duke mos lënë hapësira bosh. I vendosim me mbylljen e gjethes nga poshtë. I spërkatim me pak vaj ulliri. Vendosim mbi to 3-4 gjethe rrushi e sipër tyre vëmë një pjatë që të peshojë. Më pas hedhim ujë të valuar deri tek rrethi I pjatës. I lëmë të ziejnë në temperaturë fillimisht mesatare dhe më pas ulim pak për 25-30 minuta. I servirim të ngrohta me kos ose supë.
Japrak me gjethe rrushi
Receta e dytë: Supë me pulë dhe hudhra
Përbërësit:
400 gr mish pule
1 lgj gjalp
2 lgj vaj ulliri
5 thelpinj hudhër
2 e 1/2 lgj miell
2 gota qumësht
3 gota lëng pule
Kripë dhe piper i zi
Bukë e thekur
Përgatitja:
Fillimisht vendosim një tenxhere me pak ujë të valojë. Lajmë mishin dhe e vëmë në tenxhere, ku uji të ketë marrë valë. Shtojmë kripë dhe e lëmë të ziejë për 30 minuta. Kullojmë lëngun dhe mishin pasi të ftohet e copëtojmë me dorë në copëza të vogla.
Vendosim tenxheren me pak gjalp, vaj ulliri dhe shtpjmë në të hudhrat e shtypura e të grira në copa. E kaurdisim pak pa i dhënë ngjyrë. Shtojmë miellin dhe e kaurdisim miellin si për beshamel pa I dhënë ngjyrë. E shuajmë me qumësht duke e trazuar vazhdimisht deri sa të trashet si beshamel. Me pas shtojmë lëngun e pulës, copëzat e pulës. I japim një valë dhe më pas e shërbejmë me bukë ose brusketa të thekura. Nëse dëshironi mund të shtojmë në fund gjalp të shkrirë me pak piper të kuq ose thjesht gjalp të shkrirë.
Supë me pulë e hudhra
Komente
