Receta e parë: Pilaf bullguri me qiqra
Përbërësit
1 lgj vaj ulliri
1 lç gjalp
2 qepë mesatare
2 thelpinj hudhër
1 lgj salcë speci
1 lgj salcë domate
2 fç bullgur i trashë
1/2 karrotë
400 gr qiqra të ziera
1 lgj trumzë e thatë
1 lç nenexhik i thatë
Kripë dhe piper i zi
Përgatitja:
Në një tenxhere ngrohim vajin dhe shtojmë në të qepën e grirë në kubikë të vegjël. E kaurdisim atë derisa të bëhet transparente. Shtojmë dhe hudhrën e shtypur pak e të grirë imët, salcën dhe i trazojmë të gjitha së bashku. Shtojmë bullgurin dhe i kaurdisim mirë me qepën dhe salcën. Shqtojmë qiqrat e ziera, karrotën e grirë në rende , piper të zi, kripë, trumzë, nenexhik dhe i përziejmë të gjitha së bashku. Shtojmë 4 filxhan ujë të valuar, i vendosim kapakun dhe e lëmë të ziejë bullgurin për 15 minuta. Më pas e mbulojmë me pecetë dhe e lëmë të pushojë për 20 minuta të tjera. Më pas e shërbejmë me turshi dhe pak kos.
Pilaf bullguri me qiqra
Receta e dytë: Qumështor kosove(kajmaçin )
Përbërësit:
10 kokrra vezë
10 lugë sheqer
1,2 litër qumësht
Përgatitja:
Rrahim vezët të plota në një tas, shtojmë 10 lugë sheqer dhe i rrahim derisa sheqeri të shkrijë. Më pas shtojmë qumështin të vakur dhe e trazojmë mirë me tel dore derisa të shohim që sheqeri ka shkrirë plotësisht.
E hedhim kremin e përgatitur në një tepsi dhe e vendosim në furrën e parangrohur në temperaturën 220 gradë Celsius për 40 minuta. Pasi e nxjerrim ëmbëlsirën nga furra e lemë të ftohet plotësisht, më pas e presim me thikë në katrore dhe e shërbejmë të ftohtë.
Qumështor kosove(kajmaçin )
Receta e tretë: Sallatë me finok dhe portokall
Përbërësit:
2 finokë
2 portokaj
10 ullinj të zi pa bërthamë
1 qepë e kuqe
4 lgj vaj ulliri
2 lgj lëng portokalli
2 lgj lëng limoni
Kripë dhe piper
Përgatitja:
Fillimisht presim qepën në feta dhe e vendosim atë në një tas me ujë. Ndërkohë presim finokun në ½, e pastrojmë nga fletët e jashtme të trasha, largojmë dhe pjesën e fortë të brendshme dhe më pas e presim në feta të holla duke filluar nga fundi i saj në drejtim të kundërt.
Filetojmë më pas dhe portokallin dhe në një pjatë ose në një tas vendosim finokun dhe filetot e portokallit. Pasi kullojmë qepën e shtypim lehtë dhe e vendosim mbi fetat e portokallit. Ullinjtë i presim në unaza dhe i shtojmë në një pjatë.
Vendosim në një tas vajin e ullirit, dy lugë lëng portokalli, 2 lugë lëng limoni dhe kripë i trazojmë mirë së bashku derisa të krijohet një masë e trashë si salcë dhe spërkasim sallatën të cilën e servirim menjëherë duke e aromatizuar me pak nenexhik të freskët ose me gjethet e finokut.
Sallatë me finok dhe portokall
Komente
