Receta e parë: Spinaq dhe domate në furrë
Përbërësit:
1 kg spinaq
8 kokrra vezë
10 domate qershi
70 gr parmixhan
1 lgj miell
Kripë,piper i zi dhe arrë moskat
Vaj ulliri ose gjalp
Përgatitja:
Ngrohim furrën në temperaturën 200ºC. Lyejmë me vaj ose gjalp një tepsi me brinjë 25 cm. Kalojmë spinaqin në ujë të valuar me kripë për 2 minuta. Kullojmë spinaqin dhe e shtrydhim duke larguar ujin e tepërt dhe më pas e grijmë trashë. Në një tas rrahim 6 kokrra vezë të plota. Shtojmë 1 lugë gjelle miell, parmixhanin e grirë, kripë, piper dhe i përziejmë mirë. E hedhim këtë masë në tavën e lyer me yndyrë më parë dhe e vendosim në furrë duke e ulur temperaturën në 180ºC për 10 minuta deri sa veza të mpikset pak.
Rrahim vezët e mbetura. Shtojmë spinaqin, kripë, piper e arrë moskat dhe i përziejmë mirë. Largojmë tavën nga furra dhe shtojmë sipër spinaqin duke vendosur sipër tij copa domate të vogla dhe e vendosim përsëri në furrë për 10 minuta të tjera deri sat ë gatuhet plotësisht. E largojmë tepsinë nga furra dhe e lëmë të bjerë temperature. Më pas e presim në kuadrate dhe e shërbejmë të ngrohtë.
Spinaq dhe domate në furrë
Receta e dytë: Harapash stani (me mëlçi qingji )
Përbërësit:
500 gr mëlçi qingji
1 qepë mesatare
3 lgj gjalp
4-5 gota lëng mishi ose mëlçie
1 gotë miell misri
Kripë dhe nenexhik
Përgatitja:
Lajmë pastrojmë mëlçitë dhe i përvëlojmë në ujë të valuar me kripë. I nxjerrim nga vala dhe i presim në kubikë të vegjël. Shkrijmë pak gjalp dhe kaurdisim qepën e grirë hollë. Shtojmë mëlçitë dhe i kaurdisim së bashku. Shtojmë nenexhik dhe lëngun e mëlçive dhe i lëmë të marrin valë.
Kaurdisim veçmas miellin me pak gjalp dhe e shuajmë me lëngun me qepë e mëlçi.
Shënim: Mund të shtohet edhe mielli direkt në tenxhere pa u kaurdisur, zgjedhja është juaja.
Pasi të jetë bashkuar lëngu me qepë dhe mëlçi së bashku me miellin dhe e lëmë të valojë deri sa brumi të trashet dhe të shkëputet nga anët e enës. E vendosim në pjatë dhe sipër e spërkatim me pak gjalp.
Harapash stani (me mëlçi qingji)
Komente
