Tavë me pulë dhe makarona
Përbërësit:
1 pulë
1 qepë
3 thelpinj hudhra
2 lugë gjelle majdanoz
400 gr pure domate
Majdanoz
Kripë dhe piper i zi
500 gr makarona të vogla tub
Përgatitja:
Pastrojmë pulën dhe e ndajmë në racione. Vendosim në zjarr një tenxhere me 1.5 litra ujë dhe sapo uji të valojë vendosim në të copat e pulës, një lugë çaji kripë dhe e lëmë të ziejë për 20 minuta.
Ndërkohë në një tigan me vaj ulliri kaurdisim qepën të prerë në kubukë të vegjël, shtojmë hudhrat të prera imët, purenë e domates, majdanoz, makaronat të paziera. Shtojmë lëngun e pulës dhe I lëmë të marrin valë për 5 minuta. Më pas i transferojmë makaronat në tepsi, vendosim dhe copat e mishit mbi të dhe shtojmë dhe lëngun e mishit që ka tepruar. E vendosim tavën në furrë në temperaturën 180 gradë Celsius, për 25 minuta.
Përvëlak
Përbërësit:
1 gotë miell misri
Gjalp, vaj
1 gotë ujë të ngrohtë
2 gota kos ose dhallë
1 gotë qumësht
150 gr djathë i bardhë
Pak piper të kuq
Kripë
Përgatitja:
Ngrohim 3 lugë gjelle vaj dhe një lugë gjelle gjalp dhe në të kaurdisim miellin e misrit për 2 minuta, pa i dhënë ngjyrë.
Shtojmë ujin e ngrohtë duke e trazuar vazhdimisht. Shtojmë dhallën ose kosin dhe qumështin dhe vazhdojmë përzierjen. Rregullojmë shijen me kripë dhe trazojmë derisa anët të fillojnë të shkëputen. Nëse ju rezulton e trashë mund të shtoni ujin e ngrohtë kos, dhallë apo qumësht për të rregulluar kosistencën që dëshironi.
E shërbejmë në pjata. Shkrijmë 50 gr gjalp, I shtojmë një majë piper dhe spërkatim pjatën. I shtojmë dhe pak djathë të bardhë të thërrmuar para se ta servirim. Ju bëftë mirë.
Komente
