Artistët e Teatrit të Metropolit për herë të parë pas pandemisë COVID 19 rikthehen pranë publikut, kësaj here me ritmet e muzikës cilësore jazz, blues, swing dhe salsa. Shfaqja “Të mirësjellshmit” u prezantua në një hapësirë publike, në parkun “Rinia”nën regjin e Elona Hysenit, e cila përmes interaktivitetit më fëmijët, solli përveçse muzikës së All in Band edhe këngë të kënduara nga Amri Hasanlliu enkas për spektatorët e vegjël
“Është shumë emocionuese, pasi kemi qëndruar të gjithë në shtëpi, edhe ky ka qenë një event (1 Qershori) që na ka shijuar të gjithëve”, rrëfen regjisorja Elona Hyseni.
Muzikantët e All In Band, këngëtarët, së bashku me aktorët e balerinët kënduan edhe kërcyen bashkë me fëmijët, duke u përcjellë atyre mesazhin se si të jenë më të mirësjellshëm edhe mirënjohës në jetë.
Edukimi i fëmijëve përmes artit, muzikës dhe kërcimit, është një nga qëllimet e tjera të kësaj shfaqje.
“Nuk mund të jesh thjesht një spektator, por mund të jesh pjesë e skenës. Kjo është motoja jonë për spektatorët”, thotë regjisorja.
Regjisorja na rrëfen edhe ditët e pandemisë në shtëpi, si artiste, e cila punën e saj e ka të lidhur ngushtësisht me spektatorin.
“Ne kemi të bëjmë me masën, publikun, një gjë që krijojmë se bëjmë për vete, por për masën e gjerë. Prandaj ky moment ka qenë shumë i mirë për ne, për të bërë hapat e dikurshëm, që kemi pas për të bërë. Prandaj mendoj se për çdo artist është shumë e vështirë të qenurit në shtëpi”, thotë Hyseni.
Teatri i Metropolit prej dy muajsh prezanton shfaqjet e saj online edhe në kanalin e radiotelevizionit Publik Shqiptar.
