Moti i keq ka përfshirë vendin këtë fundjavë, me reshje dëbore e shiu dhe me ulje të ndjeshme të temperaturave.
Specialistja, Anira Gjoni, nga Instituti i Gjeoshkencave tha për Report Tv se reshjet do të vijojnë gjatë gjithë ditës së sotme në të gjithë vendin.
“Reshjet e dëborës në veri, verilindje dhe juglindje do të vijojnë me intensitet mesatar, ndërkohë në pjesën tjetër të vendit reshjet do të jenë në formën e shiut.
Në qarkun e Vlorës dhe Gjirokastrës reshjet do të jenë më intensive se qarqet e tjera”, tha Anira Gjoni për Report Tv.
Gjoni nënvizoi gjithashtu se reshjet ditën e nesërme do jenë më të dobëta se sot.
Më tej ajo shtoi se ndryshe nga vitet e fundit ky dimër do të ketë praninë e reshjeve të dëborës sidomos në zonat malore.
Ndërkohë temperaturat për javën që presim do të jenë:
Në zonat malore temperatura minimale pritet të arrijë në vlerën -4 gradë, kurse ajo maksimale 4 gradë;
Në zonat e ulëta temperatura minimale 3 gradë dhe ajo maksimale 9 gradë;
Në zonat bregdetare temperatura minimale do të jetë 4 gradë ndërsa ajo maksimale 11 gradë.
Komente
