Larmia e këngëve dhe tingujve muzikor të tenorit shqiptar Armando Kllogjeri bëri bashkë turistë dhe publikun pogradecar në një mbrëmje koncertore në sheshin “Odeon”.
Kolazhi i këngëve popullore dhe qytetare shoqëroi këngëtarin në repertorin me muzikë të larmishme, ku nuk mungoi as atmosfera e vallëzimit dhe valleve.
“Kam ardhur sot në Pogradec që t’ia shpërblej publikut që më ka ndjekur. Ne duhet ta mbrojmë me forcë folklorin tonë, origjinalitetin e muzikës tonë dhe unë jam përpjekur deri më sot dhe të jap dhe një mesazh nga ana ime”, tha ai.
Tenori foli dhe për një rikthim të mundshëm në Teatrin e Operas dhe Baletit së shpejti dhe njoftoi për surprizë në muajin tetor.
“Unë për momentin nuk jam pjesë e Teatrit të Operas dhe Baletit, shpresojmë dhe të shohim nga shtatori ose në tetori mund të rikthehem tek ky objekt kulti. Do të kemi dhe një surprizë nga tetori, por nuk dua ta zbuloj për momentin çfarë është. Nuk është bashkëpunim por më mirë të zbulojmë kur të vij por do ketë këngë të reja”, u shpreh ai.
Artisti Kllogjeri nuk shmangu as komentet për rivalin e tij në reality show Luizin, për të cilin tha që marrëdhëniet janë si në politikë.
“Unë mendoj që duhet t’ia lëmë kohës. Në fund të ditës jemi njerëz. Jemi si politikanët, që hanë e grinden, zien e prishen dhe në fund fare e gjejnë një të përbashkët.”
Mbrëmja me muzikë dhe repertor të larmishëm, bëri jo në pak raste protagonistë publikun i cili këndoi bashkë me Tenorin e mirënjohur.
