TEPELENË- Një ngjarje aksidentale në Tepelenë ka prodhuar një të plagosur dhe një efektiv policie të pezulluar nga detyra.
Një 16-vjeçar mësohet se ka shkuar për të marrë diçka në raft dhe dyshohet se pistoleta ra në tokë duke kryer qitje të pavullnetshme.
Si pasojë, 16-vjeçari ka mbetur i plagosur në këmbë, e ndërsa babai i tij, efektiv policie në DVP Gjirokastër i cili e ka mbajtur armën në mënyrë të papërgjegjshme, është pezulluar nga detyra.
"Rreth orës 10:20, ka shkuar në spital, për të marrë ndihmë mjekësore, shtetasi O. V., 16 vjeç, banues në Tepelenë. Shtetasi O. V. ndodhej në banesën e shokut të tij, shtetasit E. Gj., 16 vjeç, dhe dyshohet se aksidentalisht është plagosur në këmbë prej tij me armën e shërbimit të shtetasit T. GJ., punonjës policie në DVP Gjirokastër (babai i shtetasit E. Gj.). 16-vjeçari O. V. është duke marrë ndihmë mjekësore dhe nuk ka rrezik për jetën.
Drejtori i Drejtorisë Vendore të Policisë Gjirokastër ka pezulluar nga detyra, punonjësin e Policisë, inspektor T. Gj., dhe Drejtoria e Standardeve Profesionale në Drejtorinë e Përgjithshme të Policisë së Shtetit, ka nisur ndaj tij, hetimin disiplinor. Gjithashtu, AMP ka nisur hetimin administrativo-penal për këtë rast. Grupi hetimor, në drejtimin e Prokurorisë, po vijon veprimet për zbardhjen e plotë të rrethanave të kësaj ngjarjeje", thuhet në njoftim.
