Tërmet në Napoli, panik mes qytetarëve/ Plagoset një grua nga rënia e tavanit, mbyllen shkollat
Frikë dhe panik në qytetin e Napolit në Itali, pas një tërmeti me magnitudë 4.4 të shkallës Rihter, që goditi zonën në orët e para të mëngjesit të së mërkurës. Sipas autoriteteve, tërmeti u regjistrua në orën 01:25 me epiqendër në det, në brigjet pranë qytetit të Pocuolit, një zonë me aktivitet të njohur sizmik për shkak të pranisë së vullkanit Campi Flegrei.
Lëkundjet e forta kanë shkaktuar panik te banorët, shumë prej të cilëve kanë dalë në rrugë dhe kanë qëndruar jashtë gjatë gjithë natës nga frika e ndonjë pasgoditjeje. Mediat italiane raportojnë për dëmtime në disa ndërtesa, ku janë shkëputur copa fasadash që kanë rënë mbi trotuare dhe mbi automjete të parkuara.
Një incident i rëndë është shënuar në zonën e Bagnolit, ku një tavani i shembur brenda një banese ka lënduar një grua, e cila u nxor e gjallë nga rrënojat dhe u transportua menjëherë në spital. Gjendja e saj nuk raportohet të jetë kritike.
Për shkak të situatës, autoritetet vendore kanë vendosur mbylljen e shkollave në disa zona të qytetit, si masë paraprake për të garantuar sigurinë e nxënësve. Ndërkohë, qeveria italiane ka njoftuar se po ndjek nga afër zhvillimet dhe po monitoron situatën në terren, në bashkëpunim me shërbimet e mbrojtjes civile dhe autoritetet lokale.
Në vijim pritet një vlerësim më i plotë i dëmeve materiale, ndërsa qytetarëve u është bërë thirrje të qëndrojnë të qetë dhe të ndjekin udhëzimet e mbrojtjes civile në rast të ndonjë lëkundjeje tjetër./ LaRepublica
Komente
