28-vjeçari Alban Bruçi është personi i arrestuar ditën e sotme në rrugën “Teodor Keko” në Tiranë i shpallur në kërkim për atentatin e dështuar të ndodhur vitin e kaluar në Shkodër.
Bruçi akuzohet për veprat penale “Vrasja me paramendim”, mbetur në tentativë, dhe "Mbajtja pa leje dhe prodhimi i armëve, armëve shpërthyese dhe municionit". Së bashku me 28-vjeçarin, në pranga ka rënë dhe shoku i tij, i cili e shoqëronte me motor, 37-vjeçari Arjan Sardi, i akuzuar për veprën penale “përkrahje të autorit të krimit”.
Alban Bruçi është autor i një atentati të dështuar të ndodhur më 7 shtator në lagjen ‘Partizani’ në Shkodër për motive hakmarrje. Shënjestër tij ka qenë Arlind Kajoshi, personi që i kishte plagosur më parë babain, Vladimir Bruçin.
Por ditën e atentatit, me një automjet fuoristradë tip “Land Rover”, me targa AB230EO ka qenë duke lëvizur i vëllai, boksieri Arjon Kajoshi, i cili u qëllua me plumba.
Arlind Kajoshi së bashku me disa persona të tjerë ka dhunuar me sende të forta Vladimir Bruçin, babai i Alban Bruçit, më 3 qershor në rrugën “Pogej”, në lagjen Rus të Shkodrës, për një vend parkimi.
“Vijojnë operacionet e njëpasnjëshme nga Drejtoria e Forcës së Posaçme Operacionale, për lokalizimin dhe kapjen e shtetasve në kërkim ndërkombëtar dhe kombëtar.
Finalizohet operacioni i koduar “Operacionalja 67”.
Kapet në rrugën “Teodor Keko” dhe vihet në pranga një 28-vjeçar i shpallur në kërkim për tentativë për vrasje me paramendim dhe për armëmbajtje pa leje.
Në momentin e ndalimit, 28-vjeçari posedonte një kartë identiteti italiane false.
Vihet në pranga dhe shtetasi që shoqëronte dhe transportonte 28-vjeçarin, me motomjet.
Në vijim të operacioneve të njëpasnjëshme për kapjen e shtetasve të shpallur në kërkim ndërkombëtar dhe kombëtar, strukturat e Drejtorisë së Forcës së Posaçme Operacionale në DPPSh finalizuan operacionin e koduar “Operacionalja 67”, gjatë të cilit u kap në rrugën “Teodor Keko” dhe u vu në pranga shtetasi:
-A. B., 28 vjeç, banues në Shkodër, i cili ishte shpallur në kërkim me vendimin e vitit 2024, të Gjykatës së Shkodrës, për veprat penale “Vrasja me paramendim”, mbetur në tentativë, dhe "Mbajtja pa leje dhe prodhimi i armëve, armëve shpërthyese dhe municionit".
Gjatë kontrollit fizik, shtetasi A. B. iu gjetën një shumë parash, 3 celularë, 1 kartë SIM dhe 1 kartë identiteti italiane e dyshuar e falsifikuar, që u sekuestruan në cilësinë e provës materiale.
Gjithashtu, gjatë operacionit u vu në pranga, për përkrahje të autorit të krimit, shtetasi A. S., 37 vjeç, banues në Tiranë, i cili shoqëronte shtetasin A. B., në momentin e kapjes nga shërbimet e Policisë. Nga hetimet dyshohet se shtetasi A. S. transportonte shtetasin A. B., me motomjet, i cili u sekuestrua në cilësinë e provës materiale.
Shtetasit e kapur iu dorëzuan Drejtorisë Vendore të Policisë Shkodër që bëri ekzekutimin e urdhrave për ndalimin e shtetasit A. B. dhe arrestimin e shtetasit A. S..
Materialet procedurale do t’i kalojnë Prokurorisë, për veprime të mëtejshme”, njofton Policia e Shtetit.
Komente
Nëse i hetoni mirë ndonjë gjë do të nxirrni në drite
Përgjigju