TIRANË- Një 42-vjeçar suedez është arrestuar nga policia e Tiranës pasi i dha dokumente false një shtetase tajlandeze me qëllim trafikimin e saj në Suedi.
42-vjeçari O.S, banues në Suedi, u arrestua nga policia kufitare e Rinasit.
Sipas policisë 42-vjeçari i ka siguruar dokumente të dyshuara të falsifikuara një tajlandeze 26 vjeçe, me të cilën ka udhëtuar nga Turqia drejt Shqipërisë.
Nga hetimet ka rezultuar se 42-vjeçari i kishte siguruar dokumentet e falsifikuara kësaj shtetasje, me qëllim për ta trafikuar në Suedi, për ta shfrytëzuar për prostitucion.
Gjithashtu, nga verifikimet e kryera ka rezultuar se 42-vjeçari iu siguronte dokumente identifikimi të dyshuara të falsifikuara, edhe shtetasve të tjerë, me qëllim kalimin e paligjshëm të kufijve.
Në cilësinë e provës materiale u sekuestruan mjete identifikimi të shtetësive të ndryshme, të dyshuara të falsifikuara.
Vijon puna për identifikimin dhe kapjen e shtetasve të tjerë të implikuar në këtë veprimtari kriminale.
