TIRANË - Të dielën e 1 qershorit në Katedralen ‘Ngjallja e Krishtit’ në Tiranë u zhvillua Shërbesa e Shenjtë nën kryesimin e Kryepiskopit të Tiranës, Durrësit dhe gjithë Shqipërisë, Fortlumturi Joanit; me pjesëmarrjen e anëtarëve të Sinodit të Shenjtë dhe klerikëve.
Në të Dielën e Sinodit të parë Ekumenik, Fortlumturi Joani ngriti në gradën e Arkimandritit Atë Ignat Todrin dhe në gradën e kryedhjakonit Joan Koroveshin. Ky moment ishte emocionues për qindra besimtarët që kishin mbushur Katedralen, ndërsa fjala “I Denjë” kumboi në kishë.
Po sot, Katedralja ‘Ngjallja e Krishtit’ në Tiranë kujton 11 vjetorin e Shenjtërimit.
Në Shërbesën e sotme morën pjesë edhe Mitropoliti i Fierit dhe Apolonisë, imzot Nikolla; Mitropoliti i Elbasanit dhe Shpatit, imzot Andoni; Mitropoliti i Beratit dhe Vlorës, imzot Asti; Mitropolitit i Amantias; imzot Nathanaili; si edhe Episkopi i Krujës, imzot Anastasi.
Në fund, Fortlumturi Joani përkujtoi me një shërbesë përshpirtje Kryepiskopin e ndjerë Anastas.
“E deshëm kur e kishim, e duam edhe tani që nuk është fizikisht. Besojmë se kemi fituar një zë të fuqishëm pranë Perëndisë dhe të na mbrojë nga vendi ku është”, tha mes të tjerash kreu i Kishës Orthodhokse Autoqefale të Shqipërisë.
Komente
