Tiranë- Kontrabandonte flori dhe bizhuteri për t’i shitur në Shqipëri, arrestohet në flagrancë 39-vjeçari turk.
Gjatë momentit të prangosjes dhe kontrollit iu sekuestruan rreth 455 gramë flori, si dhe 35000 euro dhe 16200 dollarë cash, të përfituar nga shitja e sendeve me vlerë.
Gjithashtu u identifikua dhe procedua penalisht edhe bashkëpunëtori që shiste sendet me vlerë, për llogari të 39-vjeçarit turk.
“Si rezultat i administrimit të shpejtë të informacioneve të siguruara nga inteligjenca policore, për një rast të kontrabandimit të sendeve me vlerë, me qëllim shitjen në Shqipëri, Seksioni për Hetimin e Krimeve Ekonomiko-Financiare, në bashkëpunim me Komisariatin e Policisë Nr. 4 dhe me Prokurorinë e Tiranës, finalizoi operacionin “Gold”.
Në kuadër të këtij operacioni, u arrestua në flagrancë shtetasi turk B. A., 39 vjeç, banues në Stamboll, dhe u procedua në gjendje të lirë shtetasi S. B., 58 vjeç, banues në Vlorë”, njoftoi policia e kryeqytetit.
Nga kontrolli në automjetin që drejtonte shtetasi turk, në rrugën “5 Maji”, u gjetën dhe sekuestruan floriri, sendet me vlerë, valuta cash, automjeti dhe celulari e tij.
Hetimi për këtë dosje i kaluan Prokurorisë së Tiranës për hetime të mëtejshme.
Komente
