TIRANË - Forca e Posaçme "Shqiponja", në bashkëpunim me Komisariatin e Policisë Nr. 4, realizoi kontrolle të befasishme në Tiranë për kapjen e shtetasve që lëvizin me lëndë narkotike, armë zjarri dhe sende të kundërligjshme.
Gjatë kontrolleve, u arrestua 24-vjeçari M.N., i cili qarkullonte me automjetin e tij tip “BMW” në rrugën “Xhanfize Keko”, ku u gjet dhe sekuestrua një pistoletë me municion luftarak në një çantë.
'Nga kontrollet e befasishme të kryera në zona të ndryshme në Tiranë, shërbimet e Forcës së Posaçme “Shqiponja”, në bashkëpunim me shërbimet e Komisariatit të Policisë Nr. 4, kanë goditur një rast të armëmbajtjes pa leje, për të cilin u arrestua shtetasi M. N., 24 vjeç. Në rrugën “Xhanfize Keko”, shërbimet e Policisë kanë ndaluar automjetin tip “BMW” që drejtonte ky shtetas, në të cilin, gjatë kontrollit, kanë gjetur një çantë supi ku 24-vjeçari mbante një armë zjarri pistoletë dhe municion luftarak, të cilat u sekuestruan në cilësinë e provës materiale.
Gjatë kontrolleve të befasishme, janë verifikuar dhe kontrolluar dhjetëra shtetas dhe automjete.', njofton policia.
Kontrolli i automjeteve dhe shtetasve vijon në të gjithë qytetin dhe materialet procedurale janë dërguar në Prokurori për veprime të mëtejshme.
Komente
