Tiranë-Një 40-vjeçar është arrestuar nga policia e Tiranës, pasi në bashkëpunim me shtatë persona të tjerë, mes tyre ish-kreu i Klubit të Futbollit të Kamzës Naim Qarri, morën peng 35-vjeçarin Ervis Xhixha dhe e kanosën për dhënie pasurie në korrik të vitit të kaluar
"Shtetasi Fredi Keta akuzohet se në muajin korrik të vitit 2024, në bashkëpunim me 7 shtetas të tjerë, i kanë hequr lirinë një 35-vjeçari, dhe e kanë kanosur atë për dhënie pasurie. Gjatë operacionit, në muajin korrik 2024, u ekzekutua masa e sigurisë "Arrest në burg", për 4 nga këta shtetas, dhe masa e sigurisë "Arrest në shtëpi", për 3 të tjerët", informoi sot policia.
Sipas njoftimit të bluve në momentin e ndalimit, Fredi Keta i ka dhënë punonjësve të Policisë, gjeneralitete të rreme.
"Ky shtetas ishte shpallur në kërkim pasi Gjykata e Tiranës, në vijim të hetimeve të kryera në kuadër të operacionit “The debt”, i ka caktuar masën e sigurisë “Arrest në burg”, për veprat penale “Heqja e paligjshme e lirisë” dhe “Shtrëngimi me anë të kanosjes ose dhunës për dhënie pasurie”, të kryera në bashkëpunim." thuhet më tej në njoftim.
Dinamika e ngjarjes
Më 31 korrik të 2024-ës Policia zbardhi pengmarrjen e 35-vjeçarit. Në listën e personave në kërkim doli emri i Hektor Xheçukës, i konsideruar si një person që është i pozicionuar në grupin e Ervis Martinajt, ndërkohë që i përfshirë në këtë ngjarje doli edhe ish-kreu i Klubit të Futbollit të Kamzës, Naim Qarri dhe 5 persona të tjerë.
Në bashkëpunim me njëri-tjetrin, Policia e Tiranës tha se ata e kishin marrë peng 35-vjeçarin Ervis Xhixha dhe e kishin kanosur atë për t’i marrë 70 mijë euro.
I riu thuhet u mbaj tpeng për të paktën 1 orë ku dhe thuhet se u dhunua nga autorët.
Komente
