TIRANË- Ferhat Kaja, pronari i rrjetit të bareve “Stockholm”, ishte në kërkim prej datës 21 korrik të këtij viti, kur policia e shpalli të dyshuar për dhunimin e pronarit të lokal “Tokyo”, një tjetër lokali në Tiranë, në kulmin e nisjes së aksionit të qeverisë për lirimin e hapësirave publike.
Këtë të premte, policia e prangosi Ferhat Kajën në zonën e “Komunës së Parisit” në Tiranë. Gjatë kontrollit fizik, pronarit 31-vjeçar të “Stockholm” iu gjet një sasi municioni luftarak, të cilat policia tha se i sekuestroi.
Ai ndodhej në makinën e një tjetër të arratisuri të drejtësisë. Në timon ndodhej i kërkuari për vrasje në tentativë, Kid Kazazi, ish-kryetar i Forumit Rinor të Partisë Demokratike në qytetin e Kavajës. 3 muaj më parë, Gjykata e Durrësit i kishte caktuar në mungesë masë arresti në burg për veprat penale vrasje në rrethana cilësuese, mbetur në tentativë dhe armëmbajtje pa leje.
Burime nga policia sqaruan për Report Tv, se Kazazi ishte ndaluar 3 ditë më parë për verifikim, kur i kishte paraqitur efektivëve një kartë italiane me emrin Keyan Rama dhe patentën me të njëjtin identitet. Efektivët dyshuan se këto mjete identifikimi mund të ishin të falsifikuara, siç në fakt rezultuan në fund të hetimeve, dhe e vunë në vëzhgim derisa e ndaluan këtë të premte, bashkë me shokun e arratisë.
Atentati për të cilin Kid Kazazi akuzohet u shënua më 30 maj të këtij viti, në Fllakë të Durrësit. Nga automjeti i tij, ai qëlloi me armë zjarri drejt një makine në lëvizje dhe la të plagosur 36-vjeçarin Arbër Goreja. Fatmirësisht shpëtuan 2 të mitur që ishin më të në makinë. Shkak u dyshua hakmarrja, pasi Kazazi nuk ia falte Arbër Goresë disa grushte në fytyrë ndaj babait të tij të moshuar.
"Si rezultat i këtij operacioni, në zonën e quajtur “Komuna e Parisit”, është lokalizuar dhe kapur shtetasi K. K., 30 vjeç, banues në Kavajë. Ky shtetas ishte shpallur në kërkim pasi Gjykata e Durrësit i ka caktuar masën e sigurimit personal "Arrest në burg", për veprën penale "Vrasja në rrethana cilësuese", mbetur në tentativë dhe “Armëmbajtja pa leje”. 30-vjeçari, me datë 30.05.2025, në Fllakë, për motive të dobëta, ka qëlluar me armë zjarri drejt një automjeti ku udhëtonin 3 shtetas.
Në vijim të operacionit është arrestuar dhe shtetasi F. K., 31 vjeç, i cili ndodhej bashkë me 30-vjeçarin në një automjet. Nga veprimet hetimore ka rezultuar se ky shtetas ka përkrahur dhe ndihmuar 30-vjeçarin të fshihej", njoftoi Policia e Tiranës.
Ndërkohë, shoku që u arrestua me të në Tiranë, Ferhat Kaja kërkohej bashkë me të vëllanë, ortakë në lokal “Stockholm”, për dhunën me grushte e sende të forta ndaj Laert Kasajt, pronarit të bart-restorant “Tokyo”, të cilin e akuzonin se i spiunoi te kryeministri për hapësirën e zaptuar publike. Sot, të dy lokaleve, si “Stockholm” ashtu edhe “Tokyo”, u janë shembur nga IMT strukturat e jashtme pa leje.
Kid Kazazi pas plagosjes, duke u vizituar nga Ristani dhe Këlliçi
I arrestuari nga Policia e Tiranës, Kid Kazazi, nuk është emër i panjohur për të shkuarën e tij të mbushur me precedentë penalë dhe sherre të armatosura.
Ndërsa ka drejtuar Forumin Rinor të Partisë Demokratike në qytetin e Kavajës, duke qenë në krye të tij, në vitin 2016, ai ka mbetur i plagosur pas një konflikti për parkimin, para lokalit të familjes së tij. Në atë kohë Kazazi ishte vetë 21-vjeçar.
Konflikti ndodhi me ish-drejtorin e Zyrës së Punës në atë kohë në Kavajë, i cili e qëlloi me armë zjarri, duke e plagosur. Kazazi përfundoi në spital, ku në atë kohë u vizitua nga ish-Sekretari i Përgjithshëm i PD-së, Arben Ristani dhe ish-kreu i FRPD-së, Belind Këlliçi.
Në zonën e "Komunës së Parisit" në Tiranë, 30 vjeçari Kazazi është ndaluar në makinë bashkë me Ferhat Kajën, i cili rezulton se është pronar i rrjetit të lokaleve "Stockholm", që gjithashtu akuzohet për rrahjen e pronarit të “Tokyo’-s pas konfliktit për denoncimin e zaptimit të hapësirave publike.
Në momentin e kontrollit, Kazazi u ka dhënë efektivëve të Komisariatit nr. 2 dokumente të rreme identifikimi, që i përkisnin një shtetasi tjetër.
Ferhat Kaja
Një operacion i policisë së Tiranës ka çuar në arrestimin e të riut që dhunoi pronarin e lokal ‘Tokyo’ Laert Kasaj, pas sherrit për aksionin e lirimit të hapësirave publike. Report Tv ka siguruar foton e 31-vjeçarit Ferhat Kaja, i cili u arrestua teksa ishte në makinë me një tjetër person të shpallur në kërkim për një atentat 3 muaj më parë në Durrës.
Ai bashkë me të vëllanë Olti, i cili është ende në kërkim, dhunuan Lart Kasajn, pas dyshimeve se ai kishte filmuar kishte fotografuar biznesin e tyre "Stockholm" dhe e denonconte te autoritetet si subjekt që nuk kishte liruar ende hapësirat publike.
Ferhat Kaja
Ferhat Kaja
Komente
Ka qenë dhe kreu i Fresh ne Kavaje, si te fryjë era.
Përgjigju