Tiranë- Dy të rinj të dyshuar si pjesë e një grupi të shpërndarjes së kokainës dhe hashashit në kryeqytet, u arrestuan nga Policia.
Gjatë ndërhyrjes u sekuestruan doza me lëndë narkotike, 2 mjete prerëse (thika) dhe 2 pistoleta sportive.
“Shërbimet e Komisariatit të Policisë Nr. 3, bazuar në informacionet e siguruara për një rast të shitjes së lëndëve narkotike, në doza, kanë intensifikuar kontrollet për goditjen e këtij rasti dhe vënien e autorëve në pranga. Si rezultat, u kapën në flagrancë në rrugën “Mahmut Bobrati” dhe u arrestuan shtetasit -E. F., 43 vjeç dhe I. K., 37 vjeç, të dy banues në Tiranë”, thanë burime zyrtare.
Gjatë kontrollit janë gjetur sasi dhe doza të lëndëve të dyshuara narkotike dhe armë që u sekuestruan si prova materiale.
Nga hetimet dyshohet se të rinjtë, pasi siguronin lëndë narkotike, e ndanin në doza në një ambient në përdorim nga 43-vjeçari dhe më pas i shisnin ato në zona të ndryshme të Tiranës.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Komente
