TIRANË- Dy persona janë arrestuar nga policia mbrëmjen e djeshme (5 shkurt) pasi gjatë një kontrolli në banesë u janë gjetur 1 kg e 500 gramë lëndë narkotike e llojit ‘kokainë’.
Në kuadër të operacionit të koduar ‘Astir’ si vijim i megaoperacionit ‘Tempulli 2’, kanë rënë në pranga Envis Gorellari, 37 vjeç, dhe Fatjon Çiçi, 33 vjeç, të dy banues në Tiranë si dhe është shpallur në kërkim bashkëpunëtori i tyre i identifikuar si B.K.
“Shërbimet e Policisë, kanë lokalizuar në Bulevardin e Kasharit, shtetasit E. G., dhe F. Ç. Gjatë kontrollit fizik dhe të banesës së shtetasit E. G., shërbimet e Policisë, i gjetën rreth 1 kg e 500 gramë lëndë të dyshuar narkotike kokainë”- njofton policia.
Lënda narkotike së bashku me dy aparate celulare dhe një automjet, u sekuestrua në cilësinë e provës materiale. Ndërkohë policia vijon punën për kapjen e bashkëpunëtorit të 2 të arrestuarve.
